ग्राहक संरक्षण कार्यकर्त्यांनी समन्वयकाच्या भूमिकेने काम करावे -जिल्हाधिकारी श्री.गमे

उस्मानाबाद दि.19:- प्रत्येक व्यक्ती ही ग्राहक असतेच, मात्र सर्वांना ग्राहक म्हणून आपले अधिकार, हक्क याची जाणीव नसते म्हणून याबाबत जागरुकता वाढावी यासाठी ग्राहक संरक्षण कार्यकर्त्यांनी समन्वयकाच्या भूमिकेने काम करावे,असे प्रतिवादन जिल्हाधिकारी राधाकृष्ण गमे यांनी आज येथे केले.

          जागतिक ग्राहक हक्क दिना निमित्त जिल्हा परिषद यशवंतराव चव्हाण सभागृहात आयोजित कार्यक्रमात ते बोलत होते.

यावेळी जिल्हा पुरवठा अधिकारी श्रीमती शिल्पा करमरकर, तहसिलदार सुजित नरहरे, नायब तहसिलदार चंद्रकांत शिंदे, महाराष्ट्र राज्य ग्राहक कल्याण सल्लागार समिती मुंबईचे सदस्य संपतराव जळके, अखिल भारतीय ग्राहक पंचायतचे जिल्हाध्यक्ष अनिल पाटील, ग्राहक पंचायत महाराष्ट्र जिल्हा सहसंघटक प्रा. हेमंत वडणे, श्रीमती मेघा कुलकर्णी हे  मान्यवर उपस्थित होते.

          श्री. गमे पुढे म्हणाले की, प्रत्येक व्यक्ती ही ग्राहक असते मग फसवणूक का होते? या प्रश्नाचे उत्तर सर्वांनी शोधणे गरजेचे आहे. यासाठी आपण ग्राहक असताना व नसतानाही आपली भूमिका स्पष्ट असणे आवश्यक आहे, अंतर्मुख होवून आपण आपली भूमिका योग्य प्रकारे निभावतो का याचा विचार करणे ही काळाची गरज आहे असेही ते म्हणाले.

          समाजात वावरताना आपण प्रत्येकाने आपण देत असलेली सेवा ही सर्वोत्तम असावी याकडे कटाक्ष द्यावा, तसेच “कंज्युमर क्लब” स्थापित करुन शाळा-कॉलेजेसमधून ग्राहक संरक्षण आणि त्यासंबंधीच्या माहितीबाबत जनजागृती मोठया प्रमाणावर करावी. आपण स्वत: जागरुक व्हावे, इतरांनाही जागरुक करावे, आपापल्या क्षेत्रात अधिक जबाबदारीने काम करावे, असे आवाहनही यावेळी जिल्हाधिकारी श्री. गमे यांनी केले.

          ते पूढे म्हणाले, शासनाने सेवा हमी कायदा, माहितीचा अधिकार, आपले सरकार या माध्यमातून जनतेसाठी जास्तीत-जास्त सेवा देण्याचा प्रयत्न करीत आहेच, त्याचा लाभ आपण घ्यावा आणि इतरांनाही घेण्यासाठी प्रोत्साहित करावे.

          यावेळी संपतराव जळके, अनिल पाटील, हेमंत वडणे, मेघा या मान्यवरांचीही समयोचित भाषणे झाली. कार्यक्रमाची सुरुवात दीपप्रज्वलनाने झाली. कार्यक्रमाचे प्रास्ताविक जिल्हा पुरवठा अधिकारी श्रीमती करमरकर यांनी केले तर आभार तहसिलदार सुजित नरहरे यांनी मानले. सूत्रसंचालन जिल्हा आपत्ती व्यवस्थापन अधिकारी वृषाली तेलोरे यांनी केले.

उस्मानाबाद वन विभागाला संत तुकाराम वनग्राम योजनेत चांगले यश

तुळजापूर तालुक्यातील कात्री गावाला पुरस्कार

उस्मानाबाद, दि. 16:-  राज्य सरकारच्या महत्वाकांक्षी असलेल्या संत तुकाराम वनग्राम योजनेत उस्मानाबाद वन विभागाने या योजनेच्या स्पर्धेतील दोन पारितोषिके पटकावली आहेत. लातूर जिल्हयातील निलंगा तालुक्यातील लांबोटा या गावाल तर उस्मानाबाद जिल्हयातील तुळजापूर तालुक्यातील कात्री या गावाला पुरस्कार मिळाला आहे.

          विभागीय वन अधिकारी राजेश्वर सातेलीकर यांच्या मार्गदर्शनाखाली वनपरीक्षेत्र अधिकारी अशोक पवार व वन परिमंडळ अधिकारी राहूल शिंदे, वनरक्षक परशुराम राठोड यांच्या टीमसह कात्री ग्रामस्थांनी केलेल्या अथक परिश्रम व पाठपुराव्यामुळे या गावात वनक्षेत्र वाढले असल्याने त्यांना पुरस्कार मिळावा आहे.

          राज्य सरकारने संत तुकाराम वनग्राम योजना सुरु केली. वनक्षेत्रात व वनक्षेत्राच्या सीमेवर असलेल्या 15 हजार 600 गावांपैकी 12 हजार 661 गावात वनांचे रक्षण करण्यासाठी वनव्यवस्थापन समित्या स्थापन केल्या. या समित्यांनी वनांचे रक्षण करणे व अवैध वृक्षतोड, वन क्षेत्रातील अतिक्रमण, वनवनवा, अवैध चराई आदी कामे केली. या कामात चुरस होण्यासाठी दरवर्षी जिल्हास्तर व राज्यस्तरावर उत्कृष्ठ काम करणाऱ्या समित्यांना संत तुकाराम वनग्राम योजना जाहीर केली. या योजनेतील 2016-17 या वर्षाचे निकाल जाहीर करण्यात आले असून यात लातूर जिल्हयातील निलंगा तालुक्यातील लांबोटा या गावाने राज्यस्तरीय प्रथम क्रमांक मिळविला आहे तर उस्मानाबाद जिल्हयातील तुळजापूर तालुक्यातील कात्री या गावाला मराठवाडा प्रशासकीय विभागाने बक्षीस जाहीर करण्यात आले आहे.  

पाण्याचे महत्व समजून जलनियोजनाची गरज -जिल्हाधिकारी राधाकृष्ण गमे

उस्मानाबाद, दि. 16:- पाणीटंचाईच्या समस्येला आपणा सर्वांना सामोरे जावे लागत असून अशा परिस्थितीमध्ये पाण्याचे महत्त्व समजून त्याचे योग्य नियोजन केले पाहिजे, असे प्रतिपादन जिल्हाधिकारी राधाकृष्ण गमे यांनी केले.  

राज्य शासनाच्या जलसंपदा विभागाच्या वतीने जिल्ह्यात 16 ते 22 मार्च या कालावधीत जलजागृती सप्ताह साजरा करण्यात येत आहे. जिल्हा परिषदेच्या यशवंतराव चव्हाण सभागृहात या सप्ताहाचे उद्‌घाटन जिल्हाधिकारी राधाकृष्ण गमे यांच्या हस्ते करण्यात आले. यावेळी ते बोलत होते. कार्यक्रमाच्या अध्यक्षस्थानी जिल्हा परिषद अध्यक्ष नेताजी पाटील हे होते. यावेळी जिल्हा परिषदेचे मुख्य कार्यकारी अधिकारी डॉ.संजय कोलते, पाटबंधारे विभागाचे कार्यकारी अधीक्षक अभियंता श्री.सु.सा.पगार, निवासी उपजिल्हाधिकारी राजेंद्र खंदारे, उपमुख्य कार्यकारी अधिकारी (पाणी व स्वच्छता) मधुकर देशमुख आदींची प्रमुख उपस्थिती होती. प्रारंभी उपस्थित मान्यवरांच्या हस्ते भारतरत्न व स्थापत्य अभियांत्रिकी व पाणीसाठवणूक संचय धरणाचे तज्ञ सर डॉ.मोक्षगुड्डम विश्वेश्वरया यांच्या प्रतिमेचे पूजन  व  दीपप्रज्वलन करण्यात आले.

        यावेळी पुढे बोलताना जिल्हाधिकारी श्री. गमे म्हणाले की, शेती ही निसर्गावर अवलंबून आहे त्यामुळे शेती शाश्वत कशी होईल व शेतीला पाणी कसे मिळेल यासाठी उपलब्ध पाण्याचे नियोजन करुन थेंब न थेंब पाण्याचा काटकसरीने वापर केला पाहिजे. 

जिल्ह्यात बारमाही वाहणारी एकही मोठी नदी नाही व मोठे जलसाठेही नाहीत त्यासाठी शेतकऱ्यांनी जास्तीत जास्त शेततळे घेतले पाहिजेत जेणेकरुन पावसाचा खंड पडला तर उपलब्ध पाण्याचावापर शेतीसाठी करता येईल व उत्पादन क्षमता वाढण्यासही मदत होईल.पडणाऱ्या पावसाच्यापाण्याचा प्रत्येक थेंब जमिनीत मुरविणे गरजेचे आहे. 

जिल्ह्यातील पावसाचे सरासरी प्रमाण लक्षात घेऊन शेतकऱ्यांनी पिक पध्दतीमध्ये बदल करण्याची गरज आहे. आधुनिक पध्दतीने शेती पिकाचे नियोजन केले पाहिजे, ऊस पिक घेताना सूक्ष्म सिंचन पध्दतीने पाणी दिले पाहिजे.

विकेंद्रीत जलसाठे निर्माण करण्यासाठी जिल्ह्यातील जुने जलसाठे दुरुस्ती करणे, केटीवेअर दुरुस्ती करण्यासाठी प्रयत्न करण्यात येतील, असेही जिल्हाधिकारी श्री.गमे यावेळी म्हणाले.

जिल्हा परिषद अध्यक्ष नेताजी पाटील यावेळी बोलताना म्हणाले की, जिल्ह्यास सतत दुष्काळाचा सामना करावा लागत असल्याने पाण्याचा वापर काटकसरीने करण्यासाठी जनजागृती होणे गरजेचे आहे. शेतीसाठी पाण्याचा वापर करताना सुक्ष्म सिंचन पध्दतीचा अवलंब करावा.

शाश्वत पाणीसाठे निर्माण करणे, पाण्याची बचत करणे यासाठी सामाजिक जनजागृती होणे गरजेचे आहे. पाण्याची बचत करुन उत्पादन क्षमता वाढविण्यासाठी शेतकऱ्यांनी आधुनिक तंत्रज्ञानाचा वापर करावा. पाण्याचा आराखडा तयार करुन कमी पडणारे पाणी कसे जलसंवर्धन करता येईल, यासाठी शेवटच्या माणसापर्यंत पाण्याबाबत जनजागृती होणे आवश्यक आहे, असे जिल्हा परिषदेचे मुख्य कार्यकारी अधिकारी डॉ. कोलते यांनी यावेळी सांगितले.

पाटबंधारे विभागाचे  अधीक्षक अभियंता सु.सा. पगार यांनी जलजागृती सप्ताहबाबत प्रास्ताविकातून सविस्तर माहिती दिली. यावेळी प्रगतशील शेतकरी पांडुरंग आवाड, डॉ. खजूरे यांनी समयोचित मार्गदर्शन केले. आभार पाटबंधारे विभागाचे उपविभागीय अभियंता श्री.पाटील यांनी मानले. यावेळी जलसंधारण विभाग, महसूल, जिल्हा परिषद व स्वयंसेवी संस्थेचे प्रतिनिधी मोठया संख्येने उपस्थित होते. कार्यक्रमाच्या शेवटी जलप्रतिज्ञा सामूहिकरित्या घेण्यात आली.