Saturday, 1 August 2026
अभियानातून ४ हजार ४५९ लाभार्थ्यांना विविध योजनांचा थेट लाभ भूम येथे छत्रपती शिवाजी महाराज महाराजस्व समाधान शिबिर उत्साहात संपन्न
Friday, 31 July 2026
‘नशा मुक्त युवा – विकसित भारत’ अभियानांतर्गत जिल्हास्तरीय सांस्कृतिक स्पर्धा उत्साहात विद्यालय-महाविद्यालयाच्या विद्यार्थ्यांचा उत्स्फूर्त सहभाग
खरीप २०२६ राज्यांतर्गत पिकस्पर्धेसाठी ऑनलाइन अर्ज सुरू अन्नधान्य,कडधान्य व गळीतधान्य पिकांसाठी शेतकऱ्यांना सहभागाचे आवाहन
खरीप २०२६ राज्यांतर्गत पिकस्पर्धेसाठी ऑनलाइन अर्ज सुरू
अन्नधान्य,कडधान्य व गळीतधान्य पिकांसाठी शेतकऱ्यांना सहभागाचे आवाहन
धाराशिव,दि.३१ जुलै (जिमाका) राज्यातील विविध भागांतील प्रयोगशील शेतकऱ्यांनी आधुनिक तंत्रज्ञानाचा अवलंब करून घेतलेल्या विक्रमी उत्पादनाला प्रोत्साहन देणे,त्यांच्या कार्याचा गौरव करणे आणि इतर शेतकऱ्यांनाही त्यातून प्रेरणा मिळावी,या उद्देशाने राज्य शासनामार्फत दरवर्षी राज्यांतर्गत पिकस्पर्धा योजना राबविली जाते. यंदाच्या खरीप हंगाम २०२६ पासून या स्पर्धेसाठी अर्ज प्रक्रिया पूर्णपणे ऑनलाइन करण्यात आली असून,शेतकऱ्यांनी कृषी विभागाच्या संकेतस्थळावरून अर्ज करण्याचे आवाहन जिल्हा अधीक्षक कृषी अधिकारी, धाराशिव यांनी केले आहे.
यापूर्वी पिकस्पर्धेची संपूर्ण प्रक्रिया ऑफलाइन पद्धतीने राबविली जात होती.मात्र,प्रशासकीय कामकाजात पारदर्शकता आणि गतिमानता आणण्याच्या उद्देशाने यंदापासून स्वतंत्र ऑनलाइन संगणक प्रणाली (ऑनलाइन पोर्टल) विकसित करण्यात आली आहे. त्यानुसार कृषी विभागाने सन २०२६-२७ साठी अन्नधान्य, कडधान्य आणि गळीतधान्य पिकांच्या राज्यस्तरीय खरीप पिकस्पर्धा जाहीर केली आहे.
या स्पर्धेत सर्वसाधारण आणि आदिवासी गटातील शेतकरी सहभागी होऊ शकतात.
तालुकास्तरावरील स्पर्धेत सहभागी झालेल्या शेतकऱ्यांच्या उत्पादनाच्या आधारे राज्य,जिल्हा आणि तालुकास्तरावरील विजेत्यांची निवड केली जाणार आहे.खरीप हंगामातील भात, ज्वारी,बाजरी,मका,नाचणी (रागी), तूर,मूग,उडीद,सोयाबीन,भुईमूग आणि सूर्यफूल या एकूण ११ पिकांसाठी ही स्पर्धा आयोजित करण्यात आली आहे.
स्पर्धेत सहभागी होण्यासाठी शेतकऱ्याच्या स्वतःच्या नावावर जमीन असणे आणि ती स्वतः कसत असणे आवश्यक आहे. एका शेतकऱ्याला एकाच वेळी एकापेक्षा अधिक पिकांसाठी स्पर्धेत सहभागी होता येणार आहे. सहभागी लाभार्थ्याच्या शेतामध्ये भात पिकासाठी किमान २० गुंठे, तर इतर सर्व पिकांसाठी किमान ४० गुंठे सलग लागवड क्षेत्र असणे आवश्यक आहे.स्पर्धेसाठी अर्ज करताना फार्मर आयडी,प्रवेश शुल्क भरल्याचे चलन,आदिवासी गटातील शेतकऱ्यांसाठी जात प्रमाणपत्र तसेच बँक पासबुकच्या पहिल्या पानाची छायांकित प्रत सादर करणे आवश्यक आहे.
अर्ज करण्याच्या अंतिम तारखा निश्चित करण्यात आल्या आहेत. मूग आणि उडीद पिकांसाठी अर्ज करण्याची मुदत ३१ जुलै २०२६ होती.ती आता १० ऑगस्ट २०२६ पर्यंत वाढविण्यात आली आहे. तर भात,ज्वारी,बाजरी,मका,नाचणी (रागी), तूर,सोयाबीन,भुईमूग आणि सूर्यफूल या पिकांसाठी अर्ज करण्याची अंतिम मुदत ३१ ऑगस्ट २०२६ आहे.स्पर्धेचे प्रवेश शुल्क पीकनिहाय सर्वसाधारण गटासाठी ३०० रुपये,तर आदिवासी गटासाठी १५० रुपये निश्चित करण्यात आले आहे.
बक्षिसांची रक्कम तालुका,जिल्हा आणि राज्य अशा तीन स्तरांवर देण्यात येणार आहे.
तालुकास्तरावर प्रथम क्रमांकासाठी ५ हजार रुपये, द्वितीय क्रमांकासाठी ३ हजार रुपये आणि तृतीय क्रमांकासाठी २ हजार रुपये बक्षीस देण्यात येईल. जिल्हास्तरावर अनुक्रमे १० हजार, ७ हजार आणि ५ हजार रुपये,तर राज्यस्तरावर प्रथम क्रमांकासाठी ५० हजार रुपये,द्वितीय क्रमांकासाठी ४० हजार रुपये आणि तृतीय क्रमांकासाठी ३० हजार रुपये बक्षीस दिले जाणार आहे.
जास्तीत जास्त शेतकऱ्यांनी या स्पर्धेत सहभागी होण्यासाठी कृषी विभागाच्या संकेतस्थळावरील "पीक स्पर्धा नोंदणी" या टॅबद्वारे ऑनलाइन अर्ज करावेत,असे आवाहन जिल्हा अधीक्षक कृषी अधिकारी,धाराशिव यांनी केले आहे.तसेच स्पर्धेबाबत अधिक माहितीसाठी संबंधित तालुका कृषी अधिकारी कार्यालयाशी संपर्क साधण्याचे आवाहनही करण्यात आले आहे.
******
पराक्रम दिनानिमित्त राज्यस्तरीय निबंध, वक्तृत्व व रिल्स स्पर्धा थोरले बाजीराव पेशवे जयंतीनिमित्त १ ते १५ ऑगस्टदरम्यान राज्यभर विविध उपक्रम ; विद्यार्थी व नागरिकांना सहभागी होण्याचे आवाहन
पराक्रम दिनानिमित्त राज्यस्तरीय निबंध, वक्तृत्व व रिल्स स्पर्धा
थोरले बाजीराव पेशवे जयंतीनिमित्त
१ ते १५ ऑगस्टदरम्यान राज्यभर विविध उपक्रम ; विद्यार्थी व नागरिकांना सहभागी होण्याचे आवाहन
धाराशिव,दि.३१ जुलै (जिमाका) महाराष्ट्र संशोधन,उन्नती व प्रशिक्षण प्रबोधिनी (अमृत),पुणे यांच्या वतीने श्रीमंत थोरले बाजीराव पेशवे यांच्या जयंतीनिमित्त दरवर्षी १८ ऑगस्ट हा दिवस राज्यभर ‘पराक्रम दिन’ म्हणून साजरा करण्यात येतो. थोरले बाजीराव पेशवे यांच्या शौर्य,पराक्रम आणि राष्ट्रनिष्ठेचा परिचय नव्या पिढीला व्हावा,या उद्देशाने यंदा १ ते १५ ऑगस्ट २०२६ या कालावधीत राज्यस्तरीय निबंध,वक्तृत्व आणि रिल्स स्पर्धांचे आयोजन करण्यात आले आहे.
पराक्रम दिनाच्या आयोजनासाठी अमृत संस्थेमार्फत ‘पराक्रम दिन समिती’ स्थापन करण्यात आली असून,त्यामध्ये इतिहास अभ्यासक व तज्ज्ञ काकासाहेब विधाते, पांडुरंग बलकवडे,जगन्नाथ लडकत,मोहन शेटे,मंगेश खाडिलकर आणि सौ.कौमुदी परांजपे यांचा समावेश आहे.या निमित्ताने शाळा,महाविद्यालये तसेच खुल्या गटातील नागरिकांसाठी विविध स्पर्धा आयोजित करण्यात आल्या असून,जास्तीत जास्त विद्यार्थी आणि नागरिकांनी उत्स्फूर्त सहभाग नोंदवावा,असे आवाहन अमृत संस्थेचे व्यवस्थापकीय संचालक विजय जोशी यांनी केले आहे.
निबंध स्पर्धा (शालेय, महाविद्यालयीन व खुला गट)
निबंध स्पर्धेसाठी शालेय, महाविद्यालयीन आणि खुला असे तीन गट ठेवण्यात आले आहेत. स्पर्धकांनी कमाल १,००० शब्दांपर्यंतचा निबंध मराठी,हिंदी किंवा इंग्रजी भाषेत टाइप करून पीडीएफ स्वरूपात अपलोड करावा.निबंधासाठी आवश्यक संदर्भ अमृत पराक्रम दिनाच्या अधिकृत संकेतस्थळावरील लिंक, संदर्भ पुस्तके आणि माहिती पुस्तिकेवर आधारित असावेत. बक्षीसपात्र निबंधांबाबत परीक्षकांचा निर्णय अंतिम राहील.
वक्तृत्व स्पर्धा (शालेय, महाविद्यालयीन व खुला गट)
वक्तृत्व स्पर्धेतही शालेय, महाविद्यालयीन आणि खुला असे तीन गट आहेत.
स्पर्धकांनी स्वतःच्या आवाजातील जास्तीत जास्त सात मिनिटांचा मूळ व्हिडिओ सादर करणे अपेक्षित आहे.व्हिडिओ स्पष्ट आवाजातील, उत्तम दर्जाचा आणि पूर्णपणे ओरिजिनल असावा. त्यामध्ये कोणत्याही प्रकारचे व्हिज्युअल इफेक्ट्स,साऊंड इफेक्ट्स,एआय (कृत्रिम बुद्धिमत्ता) जनरेटेड प्रतिमा किंवा तत्सम साधनांचा वापर करता येणार नाही. विषयासाठी आवश्यक संदर्भ अमृत पराक्रम दिनाच्या संकेतस्थळावरील अधिकृत साहित्यावर आधारित असावेत.नियमांचे पालन करून तयार केलेला व्हिडिओ संकेतस्थळावर अपलोड करावा. बक्षीसपात्र व्हिडिओबाबत परीक्षकांचा निर्णय अंतिम राहील.
रिल्स स्पर्धा (महाविद्यालयीन व खुला गट) रिल्स स्पर्धा महाविद्यालयीन आणि खुल्या गटासाठी आयोजित करण्यात आली आहे.
स्पर्धकांनी दिलेल्या विषयांपैकी कोणत्याही एका विषयावर २ ते ३ मिनिटांची रिल्स किंवा शॉर्ट्स तयार करावीत. चित्रीकरणासाठी विषयाला अनुरूप ठिकाण,स्पष्ट व्हिडिओ आणि उत्तम ध्वनी गुणवत्ता असणे आवश्यक आहे.रिल्स स्वतःच्या आवाजात आणि स्वतःवर चित्रित केलेली असावी.मूळ विषयाच्या संदर्भानुसार आवश्यक असलेल्या प्रतिमा, ध्वनी किंवा एआयचा वापर करून मिक्सिंग करण्यास परवानगी असेल.
सहभागाची मुदत व संकेतस्थळ स्पर्धांसाठी प्रवेशिका स्वीकारण्याचा कालावधी १ ते १५ ऑगस्ट २०२६ असा आहे.स्पर्धेचे स्वरूप,विषय,बक्षिसे,नियमावली तसेच सहभाग नोंदणीची सविस्तर माहिती पराक्रम दिनाच्या अधिकृत संकेतस्थळावर उपलब्ध करून देण्यात आली आहे.
संदर्भ पुस्तके व ई-बुकची सुविधा
थोरले बाजीराव पेशवे यांच्या जीवनावर आधारित शेकडो पुस्तके उपलब्ध असली तरी या स्पर्धांसाठी आवश्यक असलेली निवडक संदर्भ पुस्तके पराक्रम दिन समितीने निश्चित केली असून त्यांची यादी अधिकृत संकेतस्थळावर प्रसिद्ध करण्यात आली आहे.तसेच थोरले बाजीराव पेशवे यांचा जीवनप्रवास सोप्या आणि संक्षिप्त स्वरूपात ई-बुकच्या माध्यमातून उपलब्ध करून देण्यात आला असून, त्याच आधारे प्रश्नावली तयार करण्यात आली आहे.
स्पर्धांसाठी समान विषय
निबंध,वक्तृत्व आणि रिल्स या तिन्ही स्पर्धांसाठी पुढील विषय समान असतील : ‘१८व्या शतकातील हिंदवी साम्राज्य विस्तारक थोरले बाजीराव पेशवे’, ‘अपराजित योद्धा थोरले बाजीराव पेशवे’,‘थोरल्या बाजीरावांचे संघटन कौशल्य’, ‘थोरल्या बाजीरावांची युद्धनीती’, ‘थोरल्या बाजीरावांची स्वामीनिष्ठा’,‘थोरल्या बाजीरावांची दिल्ली मोहीम’,‘बुंदेलखंड व छत्रसालाचे रक्षणकर्ते थोरले बाजीराव पेशवे’ आणि ‘थोरल्या बाजीरावांचा जगप्रसिद्ध पालखेड विजय’.सर्व शाळा,महाविद्यालये तसेच इच्छुक नागरिकांनी या राज्यस्तरीय उपक्रमात उत्साहाने सहभागी होऊन थोरले बाजीराव पेशवे यांच्या शौर्यपर परंपरेचा गौरव करण्याचे आवाहन अमृत संस्थेचे व्यवस्थापकीय संचालक विजय जोशी यांनी केले आहे.
*****
Thursday, 30 July 2026
अहिल्यादेवी होळकर शेतकरी कर्जमुक्ती योजना-2026 शेतकऱ्यांसाठी महत्त्वाच्या अटी, लाभ व आधार प्रामाणिकरणची सविस्तर माहिती
पुण्यश्लोक अहिल्यादेवी होळकर शेतकरी कर्जमुक्ती योजना-2026
शेतकऱ्यांसाठी महत्त्वाच्या अटी, लाभ व आधार प्रामाणिकरणची सविस्तर माहिती
धाराशिव,दि.30 जुलै (जिमाका) राज्य शासनाने दि. 02 जून 2026 रोजीच्या शासन निर्णयाद्वारे पुण्यश्लोक अहिल्यादेवी होळकर शेतकरी कर्जमुक्ती योजना 2026 ही योजना जाहीर केली.या योजनेमध्ये खालीलप्रमाणे तीन घटक आहेत.
कर्जमाफी-कर्जवाटप दिनांक 1 एप्रिल 2019 ते 31 मार्च 2025,थकबाकी दिनांक : 30 सप्टेंबर 2025, कर्जबाकी दिनांक 31 मार्च 2026, कर्जमाफी रक्कम रुपये दोन लाख.एकवेळ समझोता योजना OTS कर्जवाटप दिनांक: 01 एप्रिल 2019 ते 31 मार्च 2025, थकबाकी दिनांक 30 सप्टेंबर 2025, कर्जबाकी दिनांक 31मार्च 2026, कर्जमाफी रक्कम-रुपये दोन लाखावरील रक्कम शेतकऱ्याने बँकेत जमा केल्यानंतर कर्जमाफी रुपये दोन लाख,प्रोत्साहनपर लाभः सन 2022-23, 2023-24 व 2024-25 या आर्थिक वर्षापैकी कोणत्याही दोन वर्षी पीक कर्जाची उचल करुन विहित मुदतीत परतफेड आवश्यक. तसेच सन 2025-26 मधील पीक कर्जाची विहित मुदतीत परतफेड करणाऱ्या शेतकऱ्यांना रुपये दोन लाखावरील रक्कम दि.31 मार्च 2027 पर्यंत बँकेत जमा करावयाची आहे.
या योजनेमध्ये रुपये दोन लाखापेक्षा अधिक थकबाकी असणाऱ्या शेतकरी रुपये दोन लाखावरील रक्कम 31 मार्च 2027 पर्यंत बँकेत जमा करावयाची आहे.या योजनेमध्ये 01 एप्रिल 2019 ते 31 मार्च 2025 या कालावधीत उचल केलेले पीक कर्ज तसेच पुनर्गठन / फेरपुनर्गठन केलेल्या पीक कर्जाचा समावेश आहे.
त्याचप्रमाणे हे पीक कर्ज तसेच पुनर्गठित / फेरपुनर्गठित कर्जाची 30 सप्टेंबर 2025 अखेरची थकबाकी 31 मार्च 2026 पर्यंत परतफेड झालेली नाही,अशी रक्कम कर्जमाफीसाठी विचारात घेण्यात आली आहे.या योजनेची अंमलबजावणी महा-आयटी मार्फत विकसित केलेल्या संगणकीय प्रणालीद्वारे करण्यात येत आहे.
शासनाने दि.9 जून 2026 रोजी सर्व व्यापारी बँकांना पत्र देऊन अनुत्पादित वर्गवारीत खात्यांना विशिष्ठ प्रमाणात सवलत (Haircut) देण्याबाबत निर्देश दिले आहेत.त्याचप्रमाणे शासनाने 01 जुलै 2026 रोजी सर्व बँकांना पत्र देऊन 01 एप्रिल 2026 नंतर योजनेअतंर्गत शेतक-यांच्या कर्जखात्यावर व्याजाची आकारणी न करण्याबाबत निर्देश दिले आहेत.शासनाने अनुत्पादित कर्जखात्यांबाबत बँकांनी पुढीलप्रमाणे सवलत देण्याबाबत सूचित केले आहे.
अनुत्पादित कर्जाचा दिनांक 30 सप्टेंबर 2021 किंवा त्यापुर्वी, तडजोडीची रक्कम अनुत्पदित तारखेस कर्ज खतावणीमधील कर्जबाकीच्या 35 टक्के,अनुत्पादित कर्जाचा 01 ऑक्टोबर 2021 ते 30 सप्टेंबर 2022 तडजोडीची रक्कम अनुत्पदित तारखेस कर्ज खतावणीमधील कर्जबाकीच्या 45 टक्के, अनुत्पादित कर्जाचा दिनांक 01ऑक्टोबर 2022 ते 30 सप्टेंबर 2023 तडजोडीची रक्कम अनुत्पदित तारखेस कर्ज खतावणीमधील कर्जबाकीच्या 55 टक्के,अनुत्पादित कर्जाचा दिनांक 01 ऑक्टोबर 2023 ते 30सप्टेंबर 2024 तडजोडीची रक्कम अनुत्पदित तारखेस कर्ज खतावणीमधील कर्जबाकीच्या 70 टक्के,अनुत्पादित कर्जाचा दिनांक 01ऑक्टोबर 2024 ते 30 सप्टेंबर 2025 तडजोडीची रक्कम अनुत्पदित तारखेस कर्ज खतावणीमधील कर्जबाकीच्या 85 टक्के अशी राहील.
बँकेमार्फत सादर केलेल्या कर्जखात्यांचे महा-आयटी मार्फत योजननिकषांनुसार संगणकीय संस्करण तसेच वर नमूद केल्याप्रमाणे अनुत्पादीत कर्ज खात्यांना सवलत देण्यात येऊन 25 जुलै 2026 रोजी एकूण 16.96 लाख कर्जखात्यांची यादी आधार प्रमाणीकरणासाठी प्रसिध्द करण्यात आले आहे.यामध्ये मध्यवर्ती जिल्हा मध्यवर्ती सहकारी बँकेकडील 7.03 लाख कर्जखाती व व्यापारी बँकांकडील 9.93 लाख कर्ज खात्यांचा समावेश आहे.
प्रसिध्द करण्यात आलेल्या यादीमध्ये रुपये दोन लाखापर्यंत थकबाकी असलेल्या कर्जखात्याचा सामावेश आहे.उर्वरित कर्जखात्याचा सामावेश त्याचप्रमाणे रुपये दोन लाखावरील कर्जखात्याचा सामावेश यानंतर प्रसिध्द होणा-या याद्यामध्ये करण्यात येणार आहे.आधार प्रमाणीकरणावेळेस शेतकऱ्यांना कर्ज खात्याचा क्रमांक तसेच कर्ज रकमेच्या अचूकतेबाबत तथा मान्यतेबाबत कार्यवाही करावयाची आहे.
आधारप्रमाणीकरणासाठी प्रसिध्द केलेली यादी योजनेच्या प्रणालीवर,बँक शाखेमध्ये तसेच जिल्हा उपनिबंधक,सहकारी संस्था यांचेकडे उपलब्ध असून सदरची यादी गावस्तरावर,बैंक शाखा,विकास संस्था तसेच ग्रामपंचायत यांच्या नावासमोरदिसणाऱ्या यादीमध्ये शेतकऱ्यांच्या चावडीवर प्रसिध्द करण्यात आली आहे.
शेतकऱ्यांनी बँकेच्या यादीतील रक्कम त्याचप्रमाणे प्रणालीवरील रक्कम पाहून आधारप्रमाणीकरण करावयाचे आहे.गावस्तरावर प्रसिध्द करण्यात आलेल्या यादीमध्ये दिसत असलेली रक्कम वर नमूद केल्याप्रमाणे अनुत्पादीत कर्ज खात्यास निर्देशीत प्रमाणात सवलत आकारुन आलेली तडजोड रक्कम आहे.शासनाच्या निर्देशाप्रमाणे बँकांकडून 01 एप्रिल 2026 नंतर योजनेअंतर्गत शेतकऱ्यांच्या कर्ज खात्यावर त्यामुळे याबाबत स्पष्ट करण्यात येते की,व्याजाची आकारणी होणार नाही.25 जुलै 2026 रोजी प्रसिध्द करण्यात आलेल्या यादीतील रुपये दोन लाखापर्यतची रक्कम शासनामार्फत माफ करण्यात येणार आहे.शेतकऱ्यांना कोणतीही रक्कम बँकेत भरावी लागणार नाही.
आधार प्रमाणीकरणानंतर शेतकऱ्यांना द्यावयाच्या कर्जमाफीची रक्कम निश्चित होऊन ही रक्कम थेट लाभ वितरण पध्दतीने शेतकऱ्यांच्या कर्ज खात्यात जमा करुन कर्ज खाते निरंक करण्यात येणार आहे.तर शेतकऱ्यांना नव्याने पीक कर्जाची उपलब्धता होणार आहे.
000000
शेतकऱ्यांना कर्जमुक्तीचा लाभ वेळेत मिळावा ; जिल्हाधिकाऱ्यांची आधार प्रमाणीकरण प्रक्रियेची प्रत्यक्ष पाहणी
तुळजापूर येथे राज्यपाल जिष्णू देव वर्मा यांचे आगमन ; जिल्हाधिकाऱ्यांकडून स्वागत
छत्रपती शिवाजी महाराज महाराजस्व समाधान शिबिर १ ऑगस्टला भूम येथे आमदार डॉ.तानाजी सावंत उद्घाटक, जिल्हा परिषद अध्यक्षा अर्चनाताई पाटील प्रमुख पाहुण्या
छत्रपती शिवाजी महाराज महाराजस्व समाधान शिबिर १ ऑगस्टला भूम येथे
आमदार डॉ.तानाजी सावंत उद्घाटक, जिल्हा परिषद अध्यक्षा अर्चनाताई पाटील प्रमुख पाहुण्या
धाराशिव दि.३० जुलै (जिमाका) परंडा विधानसभा मतदारसंघातील नागरिकांच्या विविध शासकीय कामांचा तातडीने निपटारा करण्याच्या उद्देशाने भूम- परंडा- वाशी विधानसभा मतदारसंघस्तरावरील 'छत्रपती शिवाजी महाराज महाराजस्व समाधान शिबिर' शनिवार,दि. १ ऑगस्ट २०२६ रोजी सकाळी १० वाजता रामहारी मंगल कार्यालय, नगर रोड,भूम येथे आयोजित करण्यात आले आहे.या शिबिरास नागरिकांनी मोठ्या संख्येने उपस्थित राहावे,असे आवाहन आयोजकांनी केले आहे.
शिबिराचे उद्घाटन आमदार प्रा.डॉ. तानाजी सावंत,विधानसभा सदस्य, परंडा विधानसभा मतदारसंघ यांच्या हस्ते होणार आहे. कार्यक्रमाच्या प्रमुख पाहुण्या म्हणून सौ.अर्चनाताई पाटील अध्यक्षा,जिल्हा परिषद,धाराशिव उपस्थित राहणार आहेत. कार्यक्रमास लोकसभा सदस्य खासदार ओमप्रकाश राजेनिंबाळकर यांची प्रमुख उपस्थिती लाभणार आहे.तसेच बसवराज पाटील विधान परिषद सदस्य,विक्रम काळे विधान परिषद सदस्य,सतीश चव्हाण विधान परिषद सदस्य,सौ.संयोगिता गाढवे नगराध्यक्षा,नगर परिषद भूम,कीर्ती किरण पुजार जिल्हाधिकारी, धाराशिव,प्रियवंदा म्हाडदळकर मुख्य कार्यकारी अधिकारी,जिल्हा परिषद धाराशिव,रितू खोखर, पोलीस अधीक्षक,धाराशिव,सौ. पूजा ठोंगे,सभापती,पंचायत समिती भूम,सौ.अर्चना जाधव, सभापती,पंचायत समिती परंडा, सौ.प्रणिता गायकवाड,सभापती, पंचायत समिती वाशी,जाकीर म.इस्माईल सौदागर,नगराध्यक्ष, नगर परिषद परंडा तसेच सौ.विजयाबाई गायकवाड , नगराध्यक्षा,नगर परिषद,वाशी हे उपस्थित राहणार आहेत.
या समाधान शिबिरासाठी उपविभागीय अधिकारी भूम ज्योती चौहान,तहसीलदार भूम जयवंत पाटील,तहसीलदार परंडा निलेश काकडे आणि तहसीलदार वाशी प्रकाश म्हेत्रे यांनी नागरिकांना शिबिराचा लाभ घेण्यासाठी उपस्थित राहण्याचे आवाहन केले आहे.विविध शासकीय योजनांशी संबंधित प्रकरणे, महसुली सेवा तसेच नागरिकांच्या अडचणींचे निराकरण करण्यासाठी हे शिबिर उपयुक्त ठरणार आहे.
**
हरित धाराशिव अभियान २.० मध्ये स्वयंसेवी संस्थांच्या सहभागाचे आवाहन एकाच दिवसात १० लाखांहून अधिक वृक्षलागवडीचा विक्रम करण्याचा संकल्प ; पर्यावरण संवर्धनासाठी जिल्हा प्रशासनाचा पुढाकार
हरित धाराशिव अभियान २.० मध्ये स्वयंसेवी संस्थांच्या सहभागाचे आवाहन
एकाच दिवसात १० लाखांहून अधिक वृक्षलागवडीचा विक्रम करण्याचा संकल्प ; पर्यावरण संवर्धनासाठी जिल्हा प्रशासनाचा पुढाकार
धाराशिव दि.३० जुलै (जिमाका) पर्यावरण संवर्धन,हवामान बदलाच्या परिणामांवर प्रभावी उपाययोजना आणि हरित धाराशिव घडविण्याच्या उद्देशाने जिल्हा प्रशासन व उत्स्फूर्त लोकसहभागातून सन २०२६ च्या पावसाळ्यात हरित धाराशिव अभियान २.० हा महत्त्वाकांक्षी उपक्रम राबविण्यात येणार आहे. या अभियानातून पर्यावरण संरक्षणासह भावी पिढ्यांसाठी हरित वारसा निर्माण करण्याचा निर्धार जिल्हा प्रशासनाने व्यक्त केला आहे.
या अभियानांतर्गत एकाच दिवशी अवघ्या १२ तासांत घनवन (Miyawaki) पद्धतीने किमान १० लाखांहून अधिक वृक्षांची लागवड करून Guinness World Records मध्ये नव्या विक्रमाची नोंद करण्याचा संकल्प करण्यात आला आहे.मात्र हा उपक्रम केवळ विक्रम नोंदविण्यापुरता मर्यादित नसून, जिल्ह्याचे हरित क्षेत्र वाढविणे, जैवविविधतेचे संवर्धन करणे, भूजल पातळी सुधारण्यास हातभार लावणे,कार्बन शोषण क्षमता वाढविणे आणि पुढील पिढ्यांसाठी पर्यावरणपूरक वारसा निर्माण करणे हा त्यामागील प्रमुख हेतू आहे.
निसर्गाशी मैत्री जपणाऱ्या या ऐतिहासिक अभियानात जिल्ह्यातील सर्व स्वयंसेवी संस्था (NGOs), सामाजिक संस्था, युवक मंडळे,पर्यावरणप्रेमी संघटना, CSR अंतर्गत कार्य करणाऱ्या संस्था तसेच विविध सामाजिक संघटनांनी सक्रिय सहभाग नोंदवावा,असे आवाहन जिल्हा प्रशासनामार्फत करण्यात आले आहे.
अभियानांतर्गत एकाच दिवशी १२ तासांत घनवन (Miyawaki) पद्धतीने वृक्षलागवड करण्यात येणाऱ्या क्षेत्रांचा तपशील पुढीलप्रमाणे आहे : सामाजिक वनीकरण विभागामार्फत स्थळांची संख्या ४, लागवडीचे क्षेत्र (हे.) १४.५ हेक्टरवर वृक्षारोपण करण्यात येणाऱ्या रोपांची संख्या ४ लक्ष ३५ हजार,वनीकरण विभाग,प्रादेशिक,धाराशिव स्थळांची संख्या ४,लागवडीचे क्षेत्र (हे.) १४.५ हेक्टर क्षेत्रावर वृक्षारोपण करण्यात येणाऱ्या रोपांची संख्या ४ लक्ष २६ हजार, येडेशी अभयारण्य वन्यजीव, येडशी - स्थळांची संख्या १,लागवडीचे क्षेत्र (हे.) ५ हेक्टर, वृक्षारोपण करण्यात येणाऱ्या रोपांची संख्या- १५ हजार अशी एकूण स्थळांची संख्या ८, लागवडीचे क्षेत्र (हे.) ३३.७ हेक्टरवर वृक्षारोपण करण्यात येणाऱ्या रोपांची संख्या १० लक्ष ११ हजार अशी राहणार आहे.
पर्यावरणाच्या संरक्षणासाठी आणि हरित भविष्याच्या उभारणीसाठी जिल्ह्यातील नागरिक,युवक, स्वयंसेवी संस्था आणि सामाजिक संघटनांनी या लोकचळवळीत सहभागी व्हावे,असे आवाहन करण्यात आले आहे.वृक्षलागवड ही केवळ एक मोहीम नसून भावी पिढ्यांसाठी स्वच्छ हवा,समृद्ध जैवविविधता आणि सुरक्षित पर्यावरण देण्याची सामूहिक जबाबदारी असल्याची भावना या अभियानातून अधोरेखित होत आहे.
या उपक्रमात सहभागी होण्यासाठी नोंदणी करू इच्छिणाऱ्या संस्थांनी जिल्हाधिकारी कार्यालय,धाराशिव येथे प्रत्यक्ष उपस्थित राहून नोंदणी करावी,असेही प्रशासनाने कळविले आहे. पर्यावरण संवर्धनासाठी लोकसहभागाची ताकद एकवटत धाराशिव जिल्हा हरित विकासाचा नवा आदर्श निर्माण करण्याच्या दिशेने वाटचाल करीत असल्याचे या अभियानातून स्पष्ट होत आहे.
**
Wednesday, 29 July 2026
राज्यपाल श्री.जिष्णू देव वर्मा यांचा गुरुवारी तुळजापूर दौरा तुळजाभवानी देवीजींचे दर्शन घेऊन मुंबईकडे प्रयाण करणार
राज्यपाल श्री.जिष्णू देव वर्मा यांचा गुरुवारी तुळजापूर दौरा
तुळजाभवानी देवीजींचे दर्शन घेऊन मुंबईकडे प्रयाण करणार
धाराशिव,दि.२९ जुलै (जिमाका) महाराष्ट्राचे राज्यपाल तथा राज्यातील विद्यापीठांचे कुलपती श्री.जिष्णू देव वर्मा हे गुरुवार,दि.३० जुलै रोजी धाराशिव जिल्ह्याच्या दौऱ्यावर येत असून,सोलापूर येथील पुण्यश्लोक अहिल्यादेवी होळकर सोलापूर विद्यापीठाच्या २२ व्या दीक्षांत समारंभाला उपस्थित राहून राज्यपाल श्री.वर्मा हे दुपारी १२.०५ वाजता शासकीय मोटारीने तुळजापूरकडे प्रयाण करतील. दुपारी १२.४५ वाजता शासकीय विश्रामगृह येथे आगमन.आगमन होताच त्यांना स्वागत व गार्ड ऑफ ऑनर देण्यात येईल.
त्यानंतर दुपारी १२.५० वाजता शासकीय विश्रामगृह येथून श्री.तुळजाभवानी मंदिराकडे मोटारीने प्रस्थान करून दुपारी १ वाजता मंदिरात पोहोचतील.दुपारी १ ते १.३० या वेळेत राज्यपाल श्री.जिष्णू देव वर्मा हे श्री.तुळजाभवानी देवीचे दर्शन घेतील.त्यानंतर दुपारी १.३० वाजता मंदिरातून शासकीय विश्रामगृहाकडे रवाना होऊन १.४० वाजता तेथे पोहोचतील. दुपारी १.४० ते २.२० या कालावधीत भोजनासाठी वेळ राखीव ठेवण्यात आला आहे.यानंतर दुपारी २.२० वाजता राज्यपाल महामहिम श्री.वर्मा हे तुळजापूर येथून शासकीय मोटारीने सोलापूर विमानतळाकडे प्रयाण करतील.
******
दुध भेसळ प्रतिबंधक कारवाई धाराशिव दि.२९ जुलै (जिमाका) राज्यात दुधामध्ये मोठ्या प्रमाणात भेसळ होत असल्याने, या भेसळीमुळे दुध उत्पादक शेतकऱ्यांच्या दुधाला रास्त दर मिळत नाही.तसेच दुध भेसळीमुळे जनतेच्या आरोग्यावर विपरीत परिणाम होतो.राज्यातील जनतेला स्वच्छ व गुणवत्ता पुर्ण दुधाचा पुरवठा होण्याच्या दृष्टीने दुध व दुग्धजन्य पदार्थात होणारी भेसळ रोखण्यासाठी कृषी,पशुसंवर्धन, दुग्धव्यवसाय विकास व मत्स्यव्यवसाय विकास विभागाने जिल्हास्तरीय समिती गठीत केलेली आहे.
दुध भेसळ प्रतिबंधक कारवाई
धाराशिव दि.२९ जुलै (जिमाका) राज्यात दुधामध्ये मोठ्या प्रमाणात भेसळ होत असल्याने, या भेसळीमुळे दुध उत्पादक शेतकऱ्यांच्या दुधाला रास्त दर मिळत नाही.तसेच दुध भेसळीमुळे जनतेच्या आरोग्यावर विपरीत परिणाम होतो.राज्यातील जनतेला स्वच्छ व गुणवत्ता पुर्ण दुधाचा पुरवठा होण्याच्या दृष्टीने दुध व दुग्धजन्य पदार्थात होणारी भेसळ रोखण्यासाठी कृषी,पशुसंवर्धन, दुग्धव्यवसाय विकास व मत्स्यव्यवसाय विकास विभागाने जिल्हास्तरीय समिती गठीत केलेली आहे.
जिल्हयातील दुध भेसळ रोखण्यासाठी अप्पर जिल्हाधिकारी,धाराशिव यांच्या अध्यक्षतेखाली जिल्हास्तरीय समिती गठीत करण्यात आली आहे.अप्पर जिल्हाधिकारी, धाराशिव तथा अध्यक्ष, जिल्हास्तरीय दुध भेसळ समिती, धाराशिव यांनी जिल्हयात दुध भेसळ रोखण्याकरीता पोलीस प्रशासन,जिल्हा पशुसंवर्धन उपायुक्त,अन्न व औषध प्रशासन, वैद्यमापन शास्र तसेच जिल्हा दुग्धव्यवसाय विकास अधिकारी यांनी समन्वय साधून संयुक्तीक कार्यवाही करुन दुध भेसळ रोखण्यासंदर्भात नियोजनबध्द व गोपनीयतेने कारवाई करण्याचे निर्देश दिलेले आहेत.
त्यानुसार जिल्हास्तरीय दूध भेसळ समिती,धाराशिव यांच्यामार्फत दिनांक २२ जुलै २०२६ रोजी दुध भेसळ धडक मोहिमे अंतर्गत खालील प्रमाणे कारवाई करण्यांत आलेली आहे.
दिनांक २२ जुलै रोजी जिल्हयात धाराशिव तालुक्यातील डोडला डेअरी,शाखा वरुडा रोड,धाराशिव या केंद्रास दुध भेसळ धडक मोहिमे अंतर्गत भेट दिली असता प्रथम दर्शनी रेकॉर्ड प्रमाणे सकाळ व संध्याकाळ असे मिळून १२ हजार लिटर दूध संकलन झाले असल्याचे आढळून आले आहे.तपासणीसाठी गाय दूधाचे १ नमुना घेण्यांत आलेले आहे.धाराशिव तालुक्यातील शुअर सखी युनिक रियल इंटरप्रायजेस एम.आय. डी.सी.धाराशिव या केंद्रास दूध भेसळ धडक मोहिमे अंतर्गत भेट दिली असता सकाळ व संध्याकाळ असे मिळून गायीचे २ हजार ६०० लिटर व संध्याकाळचे म्हैस दूध ५०० लिटर दूध संकलन असल्याचे आढळून आले आहे.तपासणीसाठी केंद्रावर संकलीत होत असलेल्या गायीच्या दूधाचे १ नमुना घेण्यांत आलेले आहे,असे एकंदरीत एकूण २ नमुने सहाय्यक आयुक्त (अन्न), अन्न व औषध प्रशासन,धाराशिव यांच्यामार्फत तपासणीसाठी घेण्यात येऊन,हे नमुने विश्लेषणासाठी /तपासणीसाठी प्रयोगशाळेत सहाय्यक आयुक्त (अन्न),अन्न व औषध प्रशासन, धाराशिव यांच्यामार्फत पाठविण्यांत आले आहेत.
जिल्ह्यात दुध भेसळ प्रतिबंधक समितीमार्फत दुध व दुग्धजन्य पदार्थ विक्रेते,खाजगी व सहकारी दुध प्रक्रिया प्रकल्पधारक, सहकारी व खाजगी दुध संकलन केंद्र व संस्था इत्यादी ठिकाणी दुध भेसळ तपासणीसाठी मोहिम राबविण्यात येत आहे. जिल्ह्यातील सर्व दूध विक्रेते,दुध संकलन केंद्र, खाजगी व सहकारी दूध उत्पादक संस्था व दुध प्रक्रिया यांनी उच्च गुणप्रतीचे भेसळ विरहीत दुध स्वीकृत व दुग्धजन्य पदार्थ निर्मितीसह विक्री करण्याबाबत तसेच त्याकरीता वापरात येणारे वजनकाटे व दुध गुणप्रत तपासणी सयंत्रे नियमित प्रमाणीत करुन अद्यावत ठेवावीत.त्याच प्रमाणे दुग्धजन्य पदार्थ व पशुखाद्य इत्यादी बाबत उत्पादन दिनांक व मुदतपुर्व वापराबाबत माहिती छापण्याविषयी सर्व विक्रेत्यांना जिल्हास्तरीय समितीने आवाहन केले आहे.तसेच दुध भेसळबाबत FSSAI टोल फ्री नं.१८०० २२ २३६५ हा उपलब्ध करुन दिलेला असून,सदर टोल फ्री नंबरवरती दुध भेसळबाबत नागरीकांनी संपर्क साधावा असे आवाहन करण्यात येत आहे.
दुध भेसळ हा कायद्याने गुन्हा आहे.जिल्ह्यातील विक्रेते,खाजगी व सहकारी दुध प्रक्रिया प्रकल्पधारक,सहकारी व खाजगी दुध संकलन केंद्र व संस्था व नागरीकांना याबाबत सतर्क राहावे. तसेच दुधात खराब पाण्याची भेसळ केल्याने साथीच्या गंभीर आजारांचा प्रादुर्भाव होत असल्याने याला आळा घालण्याकरीता या पुढील काळात कठोर कारवाई करण्यांत येईल.या संदर्भात नागरिकांनी जागरुक राहावे असे आवाहन अप्पर जिल्हाधिकारी,धाराशिव व अप्पर पोलिस अधिक्षक,धाराशिव तसेच जिल्हा दुग्धव्यवसाय विकास अधिकारी,धाराशिव व सहाय्यक आयुक्त (अन्न),अन्न व औषध प्रशासन,धाराशिव यांच्यामार्फत तसेच समितीच्या वतीने आवाहन केले आहे.
000000
यादीतील रकमेबाबत संभ्रम नको ; आधार प्रमाणीकरणानंतरच मिळणार कर्जमाफीचा लाभ शेतकऱ्यांनी ‘आपले सरकार’ सेवा केंद्रावर जाऊन आधार प्रमाणीकरण करावे ; पुण्यश्लोक अहिल्यादेवी होळकर शेतकरी कर्जमुक्ती योजनेतील प्रसिद्ध रक्कम योग्यच
यादीतील रकमेबाबत संभ्रम नको ; आधार प्रमाणीकरणानंतरच मिळणार कर्जमाफीचा लाभ
शेतकऱ्यांनी ‘आपले सरकार’ सेवा केंद्रावर जाऊन आधार प्रमाणीकरण करावे ; पुण्यश्लोक अहिल्यादेवी होळकर शेतकरी कर्जमुक्ती योजनेतील प्रसिद्ध रक्कम योग्यच
धाराशिव,दि.२९ जुलै (जिमाका) पुण्यश्लोक अहिल्यादेवी होळकर शेतकरी कर्जमुक्ती योजना-२०२६ अंतर्गत प्रसिद्ध करण्यात आलेल्या लाभार्थी यादीतील कर्जमाफीच्या रकमेबाबत शेतकऱ्यांनी संभ्रम बाळगू नये.प्रसिद्ध यादीतील रक्कम ही रिझर्व्ह बँक ऑफ इंडियाच्या एन.पी.ए.(हेअरकट) धोरणानुसार दर्शविण्यात आली असून,प्रत्यक्ष आधार प्रमाणीकरणानंतर शेतकऱ्यांना पात्रतेनुसार संपूर्ण कर्जमाफीचा लाभ मिळणार असल्याने सर्व शेतकऱ्यांनी ‘आपले सरकार’ सेवा केंद्रावर जाऊन आधार प्रमाणीकरण करून घ्यावे,असे आवाहन जिल्हा उपनिबंधक, सहकारी संस्था,धाराशिव यांनी केले आहे.
शासनाने शेतकऱ्यांसाठी पुण्यश्लोक अहिल्यादेवी होळकर शेतकरी कर्जमुक्ती योजना-२०२६ जाहीर केली असून,तिची अंमलबजावणी शासनस्तरावर सुरू आहे.त्यानुसार २५ जुलै २०२६ रोजी धाराशिव जिल्ह्यातील ४७ हजार ८८६ शेतकऱ्यांची कर्जमाफीची यादी प्रसिद्ध करण्यात आली आहे.ही यादी जिल्ह्यातील सर्व ग्रामपंचायत व तलाठी कार्यालयांमध्ये उपलब्ध करून देण्यात आली असून, आणखी ५० ते ५१ हजार शेतकऱ्यांची यादी पुढील १५ दिवसांत प्रसिद्ध होणार आहे.
प्रसिद्ध यादीतील काही शेतकऱ्यांच्या कर्जबाकीची रक्कम कमी दिसत असल्याबाबत तक्रारी प्राप्त होत आहेत.याबाबत प्रशासनाने स्पष्ट केले आहे की,राष्ट्रीयीकृत व व्यापारी बँकांसाठी रिझर्व्ह बँक ऑफ इंडियाच्या एन.पी.ए.तारखेवरील हेअरकट धोरणानुसार यादीतील रक्कम दर्शविण्यात आली आहे.त्यामुळे ती संबंधित बँकेच्या कर्जखात्यातील प्रत्यक्ष थकबाकीपेक्षा कमी दिसू शकते.
मात्र,शेतकरी ‘आपले सरकार’ सेवा केंद्रावर जाऊन आधार प्रमाणीकरणाची प्रक्रिया पूर्ण करताच पोर्टलवर ३१ जुलै २०२६ रोजी येणे बाकी असलेली संपूर्ण पात्र कर्जरक्कम दिसून येते.तसेच त्या रकमेची नोंद असलेली प्रमाणित प्रतही शेतकऱ्यांना दिली जाते.प्रसिद्ध यादीतील सर्व पात्र शेतकऱ्यांना आधार प्रमाणीकरणानंतर रुपये २ लाखांपर्यंतच्या कर्जमाफीचा लाभ मिळणार आहे.
त्यामुळे शेतकऱ्यांनी केवळ प्रसिद्ध यादीतील रक्कम पाहून कोणताही निष्कर्ष काढू नये.यादीवरील विशिष्ट क्रमांक, स्वतःचा अॅग्रीस्टॅक क्रमांक आणि आधार कार्ड घेऊन ‘आपले सरकार’ सेवा केंद्रावर जावे.तेथे आपल्या कर्ज खाते क्रमांकाची, कर्ज रकमेची व आधार क्रमांकाची खात्री करून आधार प्रमाणीकरण पूर्ण करावे. आधार प्रमाणीकरण पूर्ण झाल्यानंतर शासनाकडून कर्जमाफीची रक्कम मंजूर होणार असून,त्यानंतर संबंधित शेतकरी पुढील कर्ज घेण्यासाठीही पात्र ठरणार असल्याचे जिल्हा उपनिबंधक,सहकारी संस्था,धाराशिव यांनी स्पष्ट केले आहे.
दरम्यान,कर्जमुक्ती योजनेच्या यादीत नाव तपासणे,अपात्रतेची कारणे जाणून घेणे,तक्रारींचे निराकरण तसेच शेतकऱ्यांना मार्गदर्शन करण्यासाठी राज्य शासनाने (०२२) ४९१५०८०२ हा हेल्पलाईन क्रमांक उपलब्ध करून दिला आहे.या हेल्पलाईनवर संपर्क साधूनही शेतकरी आपल्या शंकांचे निराकरण करून घेऊ शकतात.
जिल्ह्यातील सर्व पात्र शेतकऱ्यांनी विलंब न करता ‘आपले सरकार’ सेवा केंद्रावर जाऊन आधार प्रमाणीकरण करून कर्जमाफी योजनेचा लाभ घ्यावा,असे आवाहन जिल्हा उपनिबंधक, सहकारी संस्था,धाराशिव यांनी केले आहे.
******
Tuesday, 28 July 2026
धाराशिवमधील प्रत्येक शेतावरील पीक-पाणी परिस्थिती आता मोबाईलवर ; आय आय टी मुंबईच्या ‘वॉटर बजेट’चा अभिनव उपक्रम
धाराशिवमधील प्रत्येक शेतावरील पीक-पाणी परिस्थिती आता मोबाईलवर ; आय आय टी मुंबईच्या ‘वॉटर बजेट’चा अभिनव उपक्रम
धाराशिव,दि.२८ जुलै (जिमाका) कृषी विभाग,धाराशिव, जिल्हाधिकारी कार्यालय धाराशिव आणि आय आय टी मुंबई यांच्या संयुक्त विद्यमाने "Geo-spatial Agriculture Planning Platform for Climate Resilient Dharashiv" हा महत्त्वाकांक्षी प्रकल्प राबविण्यात येत असून,त्याअंतर्गत जिल्ह्यातील शेतकऱ्यांना त्यांच्या वैयक्तिक शेतजमिनीवरील पीक व पाणी परिस्थितीची अद्ययावत माहिती आता थेट मोबाईलवर उपलब्ध करून देण्यात येत आहे.
या प्रकल्पाची एक महत्त्वाची उपलब्धी म्हणजे शेतकऱ्यांना SMS द्वारे त्यांच्या मोबाईलवर पीक व पेरणीविषयक सल्ला पाठविण्यात येत आहे.संबंधित संदेशाचा मजकूर पुढीलप्रमाणे आहे :
"प्रिय शेतकरी,GIS तंत्राद्वारे पीक-पाणी नियोजनासाठी तुमच्या शेताची गटनिहाय माहिती पुढील लिंकवर पहा: http://1mt.in/DHRSV/qTc/enDlH — जिल्हा प्रशासन, धाराशिव."
जिल्ह्यातील Farmer ID असलेल्या आणि AgriStack मधील गटाची माहिती गावाच्या गट नकाशांशी जुळलेल्या सुमारे दोन लाख शेतकऱ्यांना हा संदेश २४ किंवा २५ जुलै २०२६ रोजी त्यांच्या नोंदणीकृत मोबाईल क्रमांकावर जिल्हा प्रशासनाकडून पाठविण्यात आला आहे.हा संदेश कोणत्याही परिस्थितीत दुर्लक्षित करू नये,असे आवाहन करण्यात आले आहे.
संदेशातील लिंकच्या माध्यमातून प्रत्येक शेतकऱ्याला त्याच्या वैयक्तिक शेतजमिनीनुसार दररोज मातीतील ओलावा,पिकाची सद्यस्थिती,पुढील सात दिवसांचा हवामान अंदाज तसेच त्या आधारे पेरणी, सिंचन आणि कीड-रोग व्यवस्थापनाविषयीचा सल्ला उपलब्ध होणार आहे.
प्रशासनाने स्पष्ट केले आहे की, SMS दररोज पाठविण्यात येणार नाही.मात्र,संदेशातील लिंक दररोज अद्ययावत केली जाणार असून, संपूर्ण हंगामभर शेतकरी त्याच लिंकवरून आपल्या शेताची ताजी परिस्थिती पाहू शकतील.त्यामुळे शेतकऱ्यांनी हा SMS किंवा त्यातील लिंक जतन करून ठेवावी,असे आवाहन करण्यात आले आहे.
आय आय टी मुंबईने विकसित केलेल्या ‘वॉटर बजेट’ मॉडेल आणि स्कायमेट संस्थेच्या हवामान अंदाजाच्या आधारे तयार होणाऱ्या विश्लेषणावर आधारित हा सल्ला शेतकऱ्यांपर्यंत पोहोचविण्यात येत आहे.जिल्ह्यात प्रथमच अशा प्रकारचा नावीन्यपूर्ण उपक्रम राबविण्यात येत असून,हवामान बदलाच्या आव्हानांना सामोरे जाणारी अधिक शाश्वत आणि वैज्ञानिक शेती घडविण्याच्या दिशेने हा एक महत्त्वाचा टप्पा ठरणार असल्याचे प्रशासनाने नमूद केले आहे.
या सल्ला प्रणालीबाबत अधिक माहितीसाठी प्रशासनाने उपलब्ध करून दिलेला YouTube व्हिडिओ https://youtube.com/shorts/883euVZEkiE?si=TghX4BEUIQeSB3Un या लिंकवर उपलब्ध करुन देण्यात आला असून ते पाहण्याचेही आवाहन करण्यात आले आहे.
******
शेतकऱ्यांनी पीक विमा योजनेत सहभागी व्हावे ; ३१ जुलैपर्यंत अर्ज करण्याचे कृषी विभागाचे आवाहन
शेतकऱ्यांनी पीक विमा योजनेत सहभागी व्हावे ; ३१ जुलैपर्यंत अर्ज करण्याचे कृषी विभागाचे आवाहन
धाराशिव दि.२८ जुलै (जिमाका) खरीप हंगामात नैसर्गिक आपत्ती, कीड व रोगांमुळे पिकांचे होणारे आर्थिक नुकसान टाळण्यासाठी शेतकऱ्यांनी प्रधानमंत्री पीक विमा योजनेत मोठ्या संख्येने सहभागी व्हावे,असे आवाहन जिल्हा अधीक्षक कृषी अधिकारी कार्यालयाने केले आहे.खरीप २०२६ हंगामासाठी कर्जदार तसेच बिगर कर्जदार शेतकऱ्यांनी ३१ जुलै २०२६ पर्यंत पीक विमा अर्ज सादर करावेत,असेही स्पष्ट करण्यात आले आहे.
प्रधानमंत्री पीक विमा योजनेअंतर्गत www.pmfby.gov.in या पोर्टलवर ऑनलाइन नोंदणी सुरू असून,योजनेचा लाभ घेण्यासाठी शेतकऱ्यांकडे फार्मर आयडी (Agristack Farmer ID) असणे तसेच ई-पीक पाहणीमध्ये विहित कालावधीत पिकांची नोंद केलेली असणे आवश्यक आहे.
खरीप २०२६ हंगामासाठी पीक विमा अर्ज भरताना मार्गदर्शक सूचनांनुसार कर्जदार तसेच बिगर कर्जदार शेतकऱ्यांना कॉमन सर्व्हिस सेंटर (CSC) मार्फत अर्ज करताना कोणतेही स्वतंत्र “पीक कर्ज घेतलेले नसल्याबाबत स्वयंघोषणापत्र/हमीपत्र” देण्याची आवश्यकता नाही.या अटीबाबत काही प्रमाणात शेतकऱ्यांमध्ये संभ्रम निर्माण झाला होता.त्यामुळे अनेक शेतकरी अर्ज करण्यास उदासीन असल्याचे निदर्शनास आले होते.हा संभ्रम दूर करण्यासाठी कृषी आयुक्तालय, महाराष्ट्र राज्य,पुणे यांनी केंद्र शासनाकडे पत्र पाठवून संबंधित हमीपत्राची अट वगळण्याची विनंती केली आहे.तसेच जिल्हास्तरावरही ही अट रद्द करण्यासाठी कृषी आयुक्तालयाकडे पाठपुरावा करण्यात आला आहे.
यावर्षी राज्यासह धाराशिव जिल्ह्यात पावसाचे प्रमाण कमी असून अनेक भागांत समाधानकारक पाऊस झालेला नाही.हवामान विभागाने पुढील कालावधीतही सरासरीपेक्षा कमी पावसाची शक्यता व्यक्त केली आहे.या पार्श्वभूमीवर खरीप हंगामातील पिकांच्या वाढीवर व उत्पादनावर विपरीत परिणाम होण्याची शक्यता नाकारता येत नसल्याने शेतकऱ्यांनी पीक विमा संरक्षण घेणे अत्यंत गरजेचे असल्याचे कृषी विभागाने नमूद केले आहे.
नैसर्गिक आपत्ती,अतिवृष्टी, दुष्काळ,अवकाळी पाऊस,कीड व रोगांमुळे होणाऱ्या पिकांच्या नुकसानीपासून आर्थिक दिलासा मिळण्यासाठी प्रत्येक पात्र शेतकऱ्याने प्रधानमंत्री पीक विमा योजनेत सहभागी व्हावे,असे आवाहन करण्यात आले आहे.
जिल्ह्यातील सर्व पात्र शेतकऱ्यांनी अंतिम मुदतीची वाट न पाहता ३१ जुलै २०२६ पूर्वी पीक विमा अर्ज भरून योजनेचा लाभ घ्यावा,असे आवाहन जिल्हा अधीक्षक कृषी अधिकारी,धाराशिव यांनी केले आहे.पीक विमा अर्ज भरण्याबाबत कोणतीही तांत्रिक अडचण अथवा अधिक माहिती आवश्यक असल्यास संबंधित सहाय्यक कृषी अधिकारी,मंडळ कृषी अधिकारी किंवा तालुका कृषी अधिकारी कार्यालयाशी संपर्क साधण्याचेही आवाहन कृषी विभागाने केले आहे.
*****
Monday, 27 July 2026
प्रत्येक योजना लाभार्थ्यांपर्यंत पोहोचल्या तर गावे समृद्ध होतील ग्रामविकास मंत्री जयकुमार गोरे आपला जीव धाराशिव – व्हिजन २०३०’ उपक्रमाचे उद्घाटन
नशामुक्त युवा फॉर विकसित भारत जिल्हास्तरीय स्पर्धेत युवकांनी सहभागी व्हावे
तुळजापूर विधानसभा मतदारसंघस्तरीय ‘छत्रपती शिवाजी महाराज महाराजस्व अभियान’ अंतर्गत समाधान व महाआरोग्य शिबिर २८ जुलै रोजी
तुळजापूर विधानसभा मतदारसंघस्तरीय ‘छत्रपती शिवाजी महाराज महाराजस्व अभियान’ अंतर्गत समाधान व महाआरोग्य शिबिर २८ जुलै रोजी
धाराशिव दि.२६ जुलै (जिमाका) महाराष्ट्र शासनाच्या वतीने तुळजापूर विधानसभा मतदारसंघस्तरीय ‘छत्रपती शिवाजी महाराज महाराजस्व अभियान’ अंतर्गत समाधान व महाआरोग्य शिबिराचे आयोजन मंगळवार,दि.२८ जुलै २०२६ रोजी सकाळी १० वाजता नळदुर्ग रोडवरील वंश मंगल कार्यालय, तुळजापूर येथे करण्यात आले आहे.या शिबिरास नागरिकांनी मोठ्या संख्येने उपस्थित राहून विविध शासकीय योजनांचा लाभ घ्यावा, असे आवाहन करण्यात आले आहे.
या शिबिराचे उद्घाटन आमदार रणाजगजितसिंह पाटील (विधानसभा सदस्य,तुळजापूर) यांच्या हस्ते होणार असून,जिल्हा परिषदेच्या अध्यक्षा अर्चनाताई पाटील या प्रमुख पाहुण्या म्हणून उपस्थित राहणार आहेत.
कार्यक्रमास लोकसभा सदस्य ओमप्रकाश राजेनिंबाळकर यांची प्रमुख उपस्थिती लाभणार आहे.तसेच विधान परिषद सदस्य बसवराज पाटील,विक्रम काळे आणि सतीश चव्हाण, जिल्हाधिकारी कीर्ती किरण पुजार,मुख्य कार्यकारी अधिकारी प्रियंवदा म्हाडदळकर, पोलीस अधीक्षक रितू खोखर, अपर जिल्हाधिकारी ज्योती पाटील,निवासी उपजिल्हाधिकारी विद्याचरण कडवकर,तुळजापूर नगर परिषदेचे नगराध्यक्ष विनोद (पिटू) गंगणे तसेच नळदुर्ग नगर परिषदेचे नगराध्यक्ष बसवराज धरणे,तुळजापूर पंचायत समितीचे सभापती विक्रमसिंह देशमुख, यांची उपस्थिती राहणार आहे.
या समाधान व महाआरोग्य शिबिरात विविध शासकीय विभागांच्या योजनांची माहिती, नागरिकांच्या तक्रारींचे निवारण, अर्जांचा स्वीकार,तसेच आरोग्यविषयक सेवा व तपासण्यांची सुविधा उपलब्ध करून दिली जाणार आहे.
मंगळवार,दि.२८ जुलै २०२६ रोजी सकाळी १० वाजता वंश मंगल कार्यालय,नळदुर्ग रोड,तुळजापूर येथे आयोजित या शिबिराचा नागरिकांनी लाभ घ्यावा,असे आवाहन उपविभागीय अधिकारी श्री.ओंकार देशमुख यांनी केले आहे.
******
Subscribe to:
Posts (Atom)