आंतरराष्ट्रीय योग दिनी आयाेजित कार्यक्रमात सहभागी होण्याचे आवाहन

उस्मानाबाद,दि.17:-  तृतीय आंतरराष्ट्रीय योग दिन बुधवार 21 जून रोजी जिल्हयात सर्वत्र साजरा करण्यात येणार आहे,त्या अनुषंगाने 21 जून रोजी सकाळी 6 ते 7 या वेळेत पोलीस मुख्यालय मैदान, उस्मानाबाद या ठिकाणी योगाबाबत कार्यक्रम होणार आहे. परंडा येथे आंतरराष्ट्रीय योग दिनाच्या कार्यक्रमाचे उद्‌घाटन आमदार सुजितसिंह ठाकूर यांच्या हस्ते कल्याणसागर माध्यमिक विद्यालयाच्या मैदानावर सकाळी 6 वाजता होणार आहे.तुळजापूर येथे सैनिक स्कूलच्या मैदानावर सकाळी 6.30 वाजता हाेणार आहे. 

या कार्यक्रमास नागरिकांनी मोठया संख्येने उपस्थित राहण्याचे आवाहन आयोजन समितीचे नितीन तावडे, नेहरु युवा केंद्राचे  धनंजय काळे, लोकमंगल फाउंडेशनचे रामराजे पाटील, आर्ट ऑफ लिव्हींगचे  नितीन भेासले, रोटरी क्लबचे प्रदीप मुंडे यांनी केले आहे

उन्नत शेती समृध्द शेतकरी अभियानांतर्गत लाभार्थींचा जेष्ठता सोडत कार्यक्रम

उस्मानाबाद,दि.20:- उन्नत शेती – समृध्द शेतकरी मोहिमेंतर्गत विविध योजनेंतर्गत कृषी यांत्रिकीकरण योजनेचा लाभ घेण्याकरीता इच्छुक शेतकऱ्यांचे 15 जून 2017 अखेर पर्यंत अर्ज मागविण्यात आले होते.

भूम,परंडा,कळंब व वाशी  तालुक्यातून प्राप्त झालेल्या अर्जांची जेष्ठता यादी तयार करण्यासाठी दि. 22 जून 2017 रोजी कृषी चिकित्सालय वाशी येथे सोडत काढण्यात येणार असून भूम तालुक्याची   सकाळी  11 वाजता व परंडा तालुक्याची दुपारी 2 वाजता सोडत काढण्यात येणार आहे.वाशी तालुक्याची दि.23 जून 2017 रोजी सकाळी 11 वाजता तर कळंब तालुक्याची दुपारी 2 वाजता सोडत काढण्यात येणार आहे.अर्ज केलेल्या शेतकऱ्यांनी या सोडतीस उपस्थित राहावे, असे आवाहन भूम उपविभागीय कृषी अधिकारी श्री.आर.टी.जाधव यांनी केले आहे.

माध्यमिक शालान्त प्रमाणपत्र (दहावी) पुरवणी परीक्षेची आवेदनपत्रे ऑनलाईन सादर

उस्मानाबाद,दि.20:-   महाराष्ट्र राज्य माध्यमिक व उच्च माध्यमिक शिक्षण मंडळामार्फत माध्यमिक शालान्त प्रमाणपत्र (इ.10 वी) परीक्षेस नियमित,पुर्नपरीक्षार्थी, नाव नोंदणी प्रमाणपत्र प्राप्त झालेले खाजगी विद्यार्थी तसेच श्रेणीसुधार योजनेंतर्गत व तुरळक विषय घेवून प्रविष्ट होणाऱ्या विद्यार्थ्यांसाठी  जुलै- ऑगस्ट 2017 परीेक्षा आयोजित करण्यात आली आहे,त्यासाठी सोमवार दि.19 जून 2017 पासून परीक्षेचे आवेदनपत्र ऑनलाईन स्वीकारण्यास सुरूवात करण्यात आली असल्याची  माहिती लातूर विभागीय मंडळाद्वारे देण्यात आली आहे.

या परीक्षेस प्रविष्ठ होऊ इच्छिणाऱ्या विद्यार्थ्यांच्या परीक्षेचे आवेदनपत्र ऑनलाईन पध्दतीने  www.mahahsscboard.maharashtra.gov.in  या संकेतस्थळावर भरावयाची असून त्यांच्या तारखा पुढीलप्रमाणे आहेत. माध्यमिक शाळांनी ऑनलाईन आवेदनपत्र नियमित शुल्क सोमवार दि.19 ते 26 जून 2017 पर्यंत तर माध्यमिक शाळांनी बँकेत चलनाद्वारे शुल्क मंगळवार दि.27 ते 30 जून पर्यंत भरावयाचे आहे. माध्यमिक शाळांनी ऑनलाईन आवेदनपत्र विलंब शुल्क मंगळवार दि.27 ते 30 जून 2017 पर्यंत तर शाळांनी बँकेत चलनाद्वारे विलंब शुल्क दि.1 ते 5 जुलै 2017 पर्यंत भरावयाचे आहे तर शाळांनी विभागीय मंडळाकडे शुल्क भरल्याच्या चलनासह विद्यार्थ्यांच्या याद्या शुक्रवार दि.7 जुलै 2017 पर्यंत जमा करावयाच्या आहेत. 

परीक्षेची आवेदनपत्रही ऑनलाईन पध्दतीने स्वीकारण्यात येणार असल्याने विद्यार्थ्यांनी आवेदनपत्र त्यांच्या शाळांमार्फत भरावीत, श्रेणीसुधार करु इच्छिणाऱ्या विद्यार्थ्यांसाठी जुलै –ऑगस्ट 2017 व मार्च -2018 अशा दोन संधी उपलब्ध राहतील.माध्यमिक शालान्त प्रमाणपत्र परीक्षा (इ.10वी) सप्टेंबर –ऑक्टोबर 2017 मध्ये घेतली जाणार नाही, याची विद्यार्थी,पालक,मुख्याध्यापक व सर्व संबंधितानी नोंद घ्यावी, असेही मंडळाद्वारे कळविण्यात आले आहे. 

अपंग प्रशिक्षण केंद्रात 30 जून पर्यंत अर्ज पाठवावेत

 उस्मानाबाद,दि.19:- नांदेड जिल्हयातील देगलूर येथील तुळजाभवानी अपंग प्रशिक्षण केंद्र, या संस्थेत महाराष्ट्र राज्य व्यवसाय शिक्षण परीक्षा मंडळ मुंबईमार्फत शासनमान्यता प्राप्त अभ्यासक्रमासाठी 15 ते 35 वयोगटातील अपंग व मूकबधीर मुला-मुलींना प्रवेश देण्यात येत आहे  इच्छुक अपंग मुला-मुलींनी, पालकांनी दि.30 जून पर्यंत अर्ज करावेत, असे संस्थेचे प्राचार्य यांनी प्रसिध्दी पत्रकाद्वारे कळविले आहे.

या प्रशिक्षण केंद्रात संगणक प्रशिक्षण (सी.सी.ईन.इन्फॉर्मेशन टेक्नॉलॉजी आणि कम्प्युटर टायपिंग), वेल्डर आणि सीट मेटल, शिवण व कर्तन कला आणि सी.सी.इन.सौंदर्यशास्त्र, सी.सी.इन वायरमन आणि प्लंबर, सी.टी.सी. इत्यादी अभ्यासक्रमांसाठी प्रवेश देण्यात येणार आहे. संस्थेत अपंग आणि मूकबधीर प्रशिक्षणार्थींना यशवंतराव चव्हाण मुक्त विद्यापीठ अंतर्गत पदवी शिक्षणाची सोय करण्यात आलेली आहे. प्रवेशितांची निवासाची, वैद्यकीय औषधोपचाराची व प्रशिक्षण साहित्याची विनामूल्य सोय केली आहे.प्रवेशितांना प्रति माह विद्यावेतन देण्यात येईल.

तरी इच्छुक अपंग मुला मुलींनी, पालकांनी दि.30 जून 2017 पर्यंत, प्राचार्य, तुळजाभवानी अपंग प्रशिक्षण केंद्र,शिवनेरी नगर, रामपूर रोड, देगलूर जि.नांदेड येथे मो.नं. 9960900369, 9175446411, 7276320578 या नंबरवर संपर्क साधावा अथवा प्रत्यक्ष भेटावे, असे या प्रशिक्षण केंद्राचे प्राचार्य यांनी कळविले आहे.

उस्मानाबाद येथे 6 जुलै रोजी मानसेवी होमगार्ड सदस्य नोंदणी

उस्मानाबाद.दि.19:- जिल्हयातील उस्मानाबाद, परंडा, उमरगा, कळंब, भूम, तुळजापूर पथकांमध्ये पुरुष व महिला होमगार्ड तसेच येडशी उपपथकामध्ये पुरुष होमगार्डची सदस्य नोंदणी दि.6 जुलै 2017 रोजी पोलीस मुख्यालय उस्मानाबाद येथे सकाळी 7 वाजल्यापासून आयोजित करण्यात आली आहे.यामध्ये 304 पुरुष तर 139 महिला असे एकूण 443 होमगार्ड सदस्यांची नोंदणी आयोजित केलेली आहे, असे अपर पोलीस अधीक्षक श्रीमती स्वाती भोर यांनी प्रसिध्दी पत्रकाद्वारे कळविले आहे.

            होमगार्ड सदस्य नोंदणीसाठी पात्रतेचे निकष पुढीलप्रमाणे असतील, शैक्षणिक अर्हता कमीत कमी 10 वी उत्तीर्ण असावा, वयोमर्यादा दि. 5 जुलै 2017 रोजी कमीत कमी 20 वर्षे पूर्ण व ते 50 वर्षे पर्यंत, उंची पुरुषांकरिता कमीत कमी 162 सें.मी. व महिलांकरिता 150 सें.मी. असावी, शारिरीक चाचणी पुरुष उमेदवार -1600 मीटर धावणे व गोळाफेक तर महिला उमेदवार -800 मीटर धावणे व गोळाफेक अशी राहील.  

माध्यमिक शालान्त प्रमाणपत्र (दहावी) पुरवणी परीक्षेचे अंतिम वेळापत्रक

उस्मानाबाद,दि.19:-   महाराष्ट्र राज्य माध्यमिक व उच्च माध्यमिक शिक्षण मंडळातर्फे जुलै- ऑगस्ट 2017 मध्ये घेण्यात येणाऱ्या माध्यमिक शालान्त प्रमाणपत्र (दहावी) पुरवणी परीक्षेचे अंतिम वेळापत्रक जाहीर करण्यात आले आहे, अशी माहिती लातूर विभागीय मंडळाद्वारे देण्यात आली आहे.

पुरवणी परीक्षेचे वेळापत्रक मंडळाचे अधिकृत  www.mahahsscboard.maharashtra.gov.in  या संकेतस्थळावर उपलब्ध करून देण्यात आले आहे. सर्वसाधारण विषयाची लेखी परीक्षा दि. 18 जुलै ते 2 ऑगस्ट 2017 दरम्यान तर प्रात्यक्षिक, श्रेणी  व तोंडी परीक्षा,दिव्यांग विद्यार्थ्यांची कार्यानुभव विषयांची लेखी व प्रात्यक्षिक परीक्षा दि. 10 जुलै ते 17 जुलै दरम्यान होईल.

शरीरशास्त्र , आरोग्यशास्त्र व गृहशास्त्र विषयाची लेखी व प्रात्यक्षिक परीक्षा दि. 17 जुलै रोजी घेण्यात येईल. आऊट ऑफ टर्न परीक्षा दि. 3 ऑगस्ट रोजी होईल.

मंडळाच्या संकेतस्थळावरील वेळापत्रकाची सुविधा ही फक्त माहितीसाठी आहे. विभागीय मंडळाव्दारे शाळांमध्ये अधिकृत वेळापत्रक देण्यात आले आहे. त्यावरूनच विद्यार्थ्यांनी खात्री करून घ्यावी. खाजगी क्लासेस किंवा अन्य यंत्रणेने, अन्य संकेतस्थळारील, जाहिरातीसाठी वितरित केलेल्या वेळापत्रकावर विद्यार्थ्यांनी अवलंबून राहू नये, खाजगी यंत्रणेने छपाई केलेल्या जाहिरातीशी अथवा वेळापत्रकाशी मंडळाचा काहीही संबंध नाही.त्यामुळे परीक्षेपूर्वी मंडळाने अधिकृतरित्या प्रसिध्द केलेल्या वेळापत्रकानुसार परीक्षार्थ्यांनी परीक्षेस प्रविष्ट व्हावे,असे आवाहन लातूर विभागीय मंडळाकडून करण्यात आले आहे.