जिल्हा एड्स प्रतिबंधात्मक नियत्रंण समिती यांची त्रैमासिक बैठक संपन्न

उस्मानाबाद,दि.27:- जिल्हा एड्स प्रतिबंधात्मक नियंत्रण समिती यांची त्रैमासिक बैठक जिल्हाधिकारी डॉ.प्रशांत नारनवरे यांच्या अध्यक्षतेखाली जिल्हाधिकारी कार्यालय सभागृहात आज पार पडली. या बैठकीस जिल्हा एड्स प्रतिबंध नियंत्रण समितीचे सर्व सभासद उपस्थित होते. या बैठकीत आढावा घेताना जिल्हाधिकारी डॉ. प्रशांत नारनवरे यांनी मागील तीन महिन्यात झालेल्या कामाचा आढावा घेतला.

यामध्ये जिल्हाधिकारी डॉ. प्रशांत नारनवरे यांनी सूचना दिल्या की, एचआयव्ही संसर्गित रुग्णांना सर्व शासकीय योजनांचा लाभ मिळवून देण्यात यावा. जिल्हयातील एचआयव्ही संसर्गिक रूग्णांची वर्ष, लिंग यानुसार माहिती तयार करून जिल्हाधिकारी कार्यालयास सादर करावी, जेणेकरून संबंधिताच्या शैक्षणिक अर्हतेनुसार संबंधितांना शासकीय सेवेत काम करण्याची संधी देता येईल तसेच जिल्हयातील सर्व स्तरातील महिलांना एनआरएलएम अतंर्गत विविध योजनांचा लाभ मिळवून देवून सर्व स्तरातील महिलांच्या सक्षमीकरणाकरिता सर्वांनी प्रयत्न  करावेत.

यावेळी जिल्हा शल्यचिकित्सक डॉ. एकनाथ माले यांनी सां‍गितले की,प्रकल्प संचालक जिल्हा ग्रामीण विकास यंत्रणा यांच्यासमवेत त्यांच्याकडील विविध योजनांचा लाभ संबंधिताना मिळवून देण्याकरिता लवकरात लवकर बैठक घेण्यात येईल तसेच जिल्हाधिकारी यांनी माहिती मागविल्यानुसार ती तयार करून एचआयव्ही संसर्गित रुग्णांना सर्व शासकीय आरोग्य योजना व इतर शासकीय योजनांचा लाभ मिळवून देण्याकरिता सर्वप्रथम प्रयत्न केला जाईल. आढावा सादर करताना जिल्हा कार्यक्रम अधिकारी गणेश काकडे यांनी सांगितले की, सन 2016-17 या वर्षांत आयसीटीसी यांचा नियमित निधी महाराष्ट्र राज्य एड्स नियंत्रण संस्था, मुंबई यांच्याकडून प्राप्त झालेला नाही. सध्या आयसीटीसीचे काम करताना वेगवेवेगळया अडचणी येत आहेत. यामध्ये मुख्यत: किट्स ठेवण्यासाठीचे रेफ्रीजरेटर सात रूग्‍णालयात नादुरुस्त आहेत. याकरिता जिल्हा नियोजन समितीकडून ते मिळविण्याची मागणी बैठकीसमोर मांडण्यात आली.तसेच आयसीटी, एआरटी केंद्रातील नऊ संगणक नादुरूस्त असल्याचे सांगण्यात आले. जिल्हाधिकारी डॉ.प्रशांत नारनवरे यांनी आपल्या केंद्रासाठी कोणत्या योजनेतून अनुदान देण्यात येईल यासाठी प्रस्ताव सादर करावेत, असे सांगितले.

या बैठकीमध्ये रूग्ण कल्याण समिती, 108 महाराष्ट्र इमर्जन्सी मेडीकल सर्व्हिसेस,पीसीपीएनडीटी, राजीव गांधी जीवनदायी आरोग्य योजना यांचा आढावा यावेळी घेण्यात आला.तसेच राष्ट्रीय तंबाखू नियंत्रण कार्यक्रम संपूर्ण जिल्हयात राबविण्याकरिता   डॉ. एकनाथ माले यांनी सर्व विभागप्रमुखांना आवाहन केले.

मुख्यमंत्र्यांच्या दिवाळीनिमित्त राज्यातील जनतेला शुभेच्छा!

मुंबई, दि. 27 : मांगल्य आणि प्रकाशाचा सण असलेला दीपोत्सव नागरिकांनी पारंपरिक उत्साहात तसेच पर्यावरणपूरक आणि सुरक्षिततेच्या जाणिवेने साजरा करावा, असे आवाहन करून मुख्यमंत्री देवेंद्र फडणवीस यांनी दिवाळीच्या शुभेच्छा दिल्या आहेत.

मुख्यमंत्री आपल्या शुभेच्छा संदेशात म्हणतात, दिव्यांचा सण असलेल्या उत्सवाच्या या पावनपर्वात मनातील सौहार्दाचे दीपही उजळावेत. यंदा समाधानकारक पावसामुळे राज्यावरील दुष्काळाचे आणि पाणीटंचाईचे सावट दूर झाले आहे. महाराष्ट्राच्या विकासपर्वात मोठा लोकसहभाग लाभल्याने राज्याची प्रगतीकडे गतिमान वाटचाल सुरू झाली आहे. या पार्श्वभूमीवर राज्यातील जनतेने हा उत्सव आनंदाने साजरा करावा.

निवडणूक कालावधीत मतदारांची गैरसोय होऊ नये म्हणून निवडणूक निरीक्षकांची नेमणूक

नगरपरिषद  सार्वत्रिक  निवडणूक-2016

उस्मानाबाद, दि.27:-राज्य निवडणूक आयोग  यांनी  उस्मानाबाद जिल्ह्यातील उस्मानाबाद , तुळजापूर, नळदूर्ग, उमरगा,मुरुम, कळंब, भूम व परंडा या आठ नगरपरिषदांच्या सार्वत्रिक  निवडणूका आणि  नगरपरिषद  अध्यक्ष पदासाठी  निवडणूक कार्यक्रम घोषित केला  आहे .

या  निवडणूक  कालावधीत सामान्य  नागरिकांची , मतदारांची गैरसोय  होऊ नये म्हणून मुख्य निवडणूक निरीक्षक व निवडणूक  निरीक्षकांची नेमणूक  करण्यात आली आहे. मुख्य निवडणूक निरीक्षक  म्हणून उस्मानाबादच्या जिल्हा परिषदेचे मुख्य कार्यकारी  अधिकारी श्री. आनंद एकनाथराव रायते (मो. 8879967788),   उमरगा , नळदूर्ग आणि मुरुम  नगरपरिषदेचे निवडणूक निरीक्षक म्हणून अप्पर जिल्हाधिकारी श्री.ए.पी. पाठक (मो.9422242323, 9420218500),  कळंब, भूम आणि परंडा नगरपरिषदेचे निवडणूक निरीक्षक  म्हणून  जिल्हा परिषदेचे अति. मुख्य कार्यकारी  अधिकारी श्री.ए.एस.शेंगुलवार (मो.9689271381) आणि उस्मानाबाद  व तुळजापूर नगरपरिषदेचे निवडणूक निरीक्षक म्हणून  जिल्हा ग्रामीण विकास यंत्रणेच्या प्रकल्प संचालिका श्रीमती आर .एस. सातपुते (मो.9423294010) यांची नेमणूक  करण्यात आली आहे .

निवडणूक  संदर्भात  निर्माण होणाऱ्या  अडचणींबाबत नागरीकांनी आणि मतदारांनी   वरील मुख्य निवडणूक निरीक्षक आणि  निवडणूक निरीक्षक यांच्याशी  संपर्क साधावा , असे  आवाहन जिल्हाधिकारी डॉ. प्रशांत नारनवरे  यांनी केले आहे .

नगरपरिषद सार्वत्रिक निवडणूकीच्या पार्श्वभूमीवर जिल्हयात शस्त्र व जमावबंदी

नगरपरिषद सार्वत्रिक निवडणूक-2016

उस्मानाबाद,दि.26:-जिल्ह्यात 26 ऑक्टोबर ते 4 नोव्हेंबर 2016 पर्यंत मुंबई पोलीस अधिनियम 1951 च्या कलम 37 (1) व (3) अन्वये प्रतिबंधात्मक आदेश लागू करण्यात आले आहेत. यासंदर्भात अप्पर जिल्हादंडाधिकारी  यांनी जारी केलेल्या आदेशात म्हटले आहे की, या कालावधीत जिल्हयात नागरिकांना शस्त्र किंवा तत्सम वस्तू बाळगण्यास अथवा त्यांची वाहतूक करण्यास बंदी राहिल.

आवेशी भाषणे, अंगविक्षेप, विडंबनात्मक नक्कला करता येणार नाहीत. सभ्यतेस व नीतीमत्तेस बाधा येईल किंवा अराजकता माजेल अशी चित्रे, नकाशे, घोषणा फलक, चिन्ह आणि अशा अन्य वस्तू जवळ बाळगता येणार नाहीत. व्यक्ती किंवा समूहाच्या भावना जाणूनबुजून दुखविण्याच्या उद्देशाने वाद्य वाजविता येणार नाहीत.

तसेच पाच किंवा पाचपेक्षा अधिक व्यक्तींना एकत्र येण्यास, सभा घेण्यास किंवा मिरवणुका काढण्यास मनाई करण्यात आली आहे. या आदेशाचा भंग करणाऱ्यांविरुध्द कायदेशीर कारवाई करण्यात येईल. हे आदेश दि. 26 ऑक्टोबर  पासून   4 नोंव्हेबर, 2016 रोजीच्या  मध्यरात्रीपर्यंत लागू राहतील.       

नगरपरिषद सार्वत्रिक निवडणूकीच्या पार्श्वभूमीवर

जिल्हयात कलम 144 लागू

उस्मानाबाद:-राज्य निवडणूक  आयोगाने दि. 17 ऑक्टोबर 2016 रोजी  नगरपरिषद/ नगरपंचायतीच्या सार्वत्रिक  निवडणूका  आणि  नगरपरिषद अध्यक्षांचा निवडणूक  कार्यक्रम घोषित  केला आहे.या कालावधीत  आदर्श आचारसंहितेच्या अनुषंगाने  तसेच कायदा व सुव्यवस्थेच्या दृष्टीकोनातून अप्पर जिल्हाधिकारी  यांनी फौजदारी  प्रक्रिया संहिता  1973 चे कलम 144 अन्वये  दि. 26 ते 28 नोव्हेंबर 2016 रोजीपर्यंत  निवडणूक निर्णय अधिकारी यांच्या कार्यालय परिसरात  निवडणूक आचारसंहिता  संपेपर्यंत, मतदान केंद्राच्या परिसरात  मतदाना दिवशी  तसेच मत मोजणी केंद्रापासून  100 मीटर च्या परिसरात  बंदी आदेश  लागू करण्यात आले आहेत .

हे आदेश उस्मानाबाद जिल्ह्यासाठी दि. 24 ऑक्टोबर 2016 ते निवडणूक  आचारसंहिता संपेपर्यंत  अंमलात राहतील, असे अप्पर जिल्हाधिकारी यांनी कळविले आहे .

नगर परिषद निवडणूक-2016 सनियंत्रण समितीची बैठक संपन्न

राज्य निवडणूक आयोगाने राज्यातील 212 नगर परिषदा आणि नगर पंचायतींसाठी निवडणूक कार्यक्रम जाहीर केला आहे. त्यानुसार उस्मानाबाद जिल्ह्यातील आठ नगर परिषदांसाठी दिनांक 27 नोव्हेंबर 2016 रोजी मतदान होणार असून दिनांक 28 नोव्हेंबर 2016 रोजी मतमोजणी होणार आहे.

या निवडणूका निर्भयपणे व पारदर्शक पध्दतीने पार पाडण्यासाठी सर्व विभागांनी परस्पर समन्वयाने काम करावे,असे निर्देश जिल्हाधिकारी डॉ.प्रशांत नारनवरे यांनी दिले.

जिल्हाधिकारी कार्यालयात झालेल्या नगर परिषद निवडणूक-2016 च्या सनियंत्रण समितीच्या बैठकीत जिल्हाधिकारी डॉ. नारनवरे बोलत होते. यावेळी  जिल्हा परिषदेचे मुख्य कार्यकारी अधिकारी आनंद रायते, पोलीस अधीक्षक पंकज देशमुख,  निवासी उपजिल्हाधिकारी सुनिल यादव,  उपजिल्हाधिकारी (निवडणूक) प्रभोदय मुळे,  जिल्हा कोषागार अधिकारी विशाल पवार, नगर पालिका प्रशासन अधिकारी राजीव बुबणे, सहायक आयुक्त विक्रीकर विभाग श्री. मामीले, या सनियंत्रण समिती सदस्यांची उपस्थिती होती.

नगर परिषदांच्या निवडणूकीच्या अनुषंगाने आदर्श आचारसंहिता अंमलात आली असल्याने सर्व शासकीय यंत्रणांनी आचारसंहितेच्या मार्गदर्शक सूचनांचे काटेकोरपणे पालन व अंमलबजावणी करावी. उस्मानाबाद जिल्हयात होणार असलेल्या आठ नगर परिषदांच्या निवडणूक निर्णय अधिकारी आणि सहाय्यक निवडणूक निर्णय अधिकारी यांनीही आदर्श आचासंहितेच्या मार्गदर्शक सूचनांचे पालन करावे. तसेच निवडणूक कालावधीत जिल्हयात कायदा व सुव्यवस्था अबाधित राहण्यासाठी पोलीस विभागाने दक्षता घ्यावी असे जिल्हाधिकारी डॉ. प्रशांत नारनवरे यांनी सांगून निवडणूक होणाऱ्या नगर परिषदांच्या कार्यक्षेत्रातील मतदारांमध्ये मतदानाबाबत व्यापक जनजागृती करण्याच्या सूचना संबंधितांना दिल्या.

तसेच मुख्य कार्यकारी  अधिकारी आनंद रायते , अप्पर जिल्हाधिकारी अविनाश पाठक आणि जिल्हा कोषागार अधिकारी विशाल पवार यांनी आदर्श आचारसंहितेची अंमलबजावणी व खर्चावर नियंत्रण ठेवणे, निवडणूक सनियंत्रण समिती, व्हिडीयोग्राफी सर्व्हेलियन्स पथक, भरारी पथक, चेक पोस्ट, तक्रार निवारण कक्ष, मतदार जनजागृती, निवडणूक काळात काय करावे काय करु नये, मालमत्तेचे विद्रुपीकरण विरोधी कायद्याची अंमलबजावणी, निवडणूक काळात परवानाधकांची शस्त्रे जमा करणे,पेड न्यूज याबाबत सविस्तर माहिती दिली.

या बैठकीस नगर परिषद निवडणूक सनियंत्रण समितीचे सदस्य, अधिकारी व कर्मचारी उपस्थित होते.

आधार क्रमांक रास्तभाव दुकानदाराकडे दि.15 नोंव्हेबर पर्यत नोंदविण्याचे आवाहन -जिल्हा पुरवठा अधिकारी

उस्मानाबाद,दि.25:- राष्ट्रीय अन्नसुरक्षा अधिनियमन 2013 अंतर्गत समाविष्ट करावयाच्या ज्या शिधापत्रिकाधारकाकडे आधार क्रमांक उपलब्‍ध नसेल,अशा जिल्हयातील सर्व लाभार्थ्यांनी आपला आधार क्रमांक अद्याप संबधित रास्तभाव दुकानदार,कार्यालय यांच्याकडे उपलब्ध करून दिलेला नसेल त्यांनी  दि.15 नोव्हेंबर 2016 पर्यंत आधार क्रमांक उपलब्ध करुन देण्यात यावा, अन्यथा लाभार्थी यादीतून  नावे कायमस्वरुपी वगळण्यात येवून अन्नधान्याचा लाभ दिला जाणार नाही असे आवाहन जिल्हा पुरवठा अधिकारी यांनी केले आहे.

                           ज्या स्वस्त धान्य लाभार्थींनी अद्याप पर्यंत आधार क्रमांक उपलब्ध करुन दिलेला नसेल अशा अंत्योदय अन्न योजना, प्रधान्य कुटुंब योजना, एपीएल(केशरी) शिधापत्रिकाधारक शेतकरी योजनेतील सर्व लाभार्थ्यांनी दि. 15 नोव्हेंबर 2016 पर्यंत आधार क्रमांक  संबंधित रास्तभाव दुकानदारकडे उपलब्ध करुन देण्यात यावा, तरी ज्या लाभार्थ्यांना सध्या अन्न धान्याचा लाभ मिळत आहे, परंतू ज्यांनी अद्याप आपला आधार क्रमांक उपलब्ध करुन दिलेला नाही, अशा सर्व लाभार्थ्यांची नावे दि.16 नोव्हेंबर 2016 पासून यादीतून कायमस्वरुपी वगळण्यात येवून त्यांना अन्नधान्याचा लाभ दिला जाणार नाही.आधार क्रमांक न दिलेल्या  सर्व योजनेतील लाभार्थ्यांनी  दि.15 नोव्हेंबर 2016 पर्यंत आधार क्रमांक उपलब्ध करुन देण्यात यावे अशी सूचना  जिल्हा पुरवठा अधिकारी यांनी केले आहे.

मध्यम मुदतीचे तंत्रशिक्षण

भारत सरकारच्या लघु, मध्यम उद्योग मंत्रालय व  जर्मनीच्या संयुक्त विद्यमाने औरंगाबाद येथे इन्डो जर्मन या संस्थेची स्थापना करण्यात आली आहे.  या संस्थेच्या वतीने कुशल मनुष्यबळासाठी विविध अभ्यासक्रम शिकविले जातात.  संस्थेने नुकतीच काही पूर्ण वेळ व काही अर्ध वेळ अभ्यासक्रमांच्या प्रवेशाची घोषणा केली आहे.  हे अभ्यासक्रम नोव्हेंबर महिन्यापासून सुरु होत असून संस्थेच्या औरंगाबाद/नागपूर/पुणे/ मुंबई केंद्रांमध्ये उपलब्ध आहेत. या अभ्यासक्रमांचे नाव, कालावधी, आवश्यक पात्रता आदी माहिती पुढीलप्रमाणे आहे.

  पूर्णवेळ अभ्यासक्रम

(1) मास्टर सर्टिफिकेट कोर्स इन कॉम्प्युटर एडेड टूल इंजिनियरिंग (2)मास्टर सर्टिफिकेट कोर्स इन कॅड/कॅम (3) मास्टर सर्टिफिकेट कोर्स इन टूल डिझाईन (4) मास्टर सर्टिफिकेट कोर्स इन प्रोडक्ट डिझाईन (5) मास्टर सर्टिफिकेट कोर्स इन सीएनसी टेक्नॉलॉजी. अनुक्रमांक 1 ते 5 या अभ्यासक्रमांसाठी उमेदवार हे मेकॅनिकल/प्रॉडक्शन किंवा समकक्ष विषयातील इंजिनियरिंग मधील पदवी/पदवीकाधारक असावेत. (6) मास्टर सर्टिफिकेट कोर्स इन मेकॅट्रॉनिक्स (7) मास्टर सर्टिफिकेट कोर्स इन इंडस्ट्रियल ऑटोमेशन ॲण्ड रोबोटिक्स. अनुक्रमांक 6 व 7 या अभ्यासक्रमांसाठी  उमेदवार हे इलेक्ट्रिकल/ ईसीई/ इन्स्ट्रुमेंटेंशन/ मेकॅनिकल/प्रॉडक्शन किंवा समकक्ष विषयातील इंजिनियरिंग पदवीधर असावेत. (8) मास्टर सर्टिफिकेट कोर्स इन स्ट्रक्चरल डिझाईन ॲण्ड ॲनॅलिसिस- या अभ्यासक्रमासाठी उमेदवार हे सिव्हिल इंजिनियरिंग मधील किंवा समकक्ष विषयातील पदवी/पदवीकाधारक असावेत. (9) मास्टर सर्टिफि‍केट कोर्स इन वेल्डींग ऑपरेशन या अभ्यासक्रमासाठी उमेदवार हे मेकॅनिकल/प्रॉडक्शन किंवा समकक्ष विषयातील इंजिनियरिंग पदवी/पदविकाधारक असावेत.

अर्धवेळ अभ्यासक्रम

(10)  सर्टिफिकेट कोर्स इन टूल डिझाईन अॅण्ड कॅड/कॅम (11) सर्टिफिकेट कोर्स इन कॅड /कॅम (12) सर्टिफिकेट कोर्स इन टूल डिझाईन (13) सर्टिफिकेट कोर्स इन प्रॉडक्ट डिझाईन (14) सर्टिफिकेट कोर्स इन रिव्हर्स इंजिनियरिंग ॲण्ड 3डी प्रिंटींग. अनुक्रमांक 10 ते 14 या अभ्यासक्रमांसाठी उमेदवार हे मेकॅनिकल/प्रॉडक्शन/ऑटो किंवा समकक्ष विषयातील इंजिनियरिंग पदवी/पदविकाधारक/आयटीआय पूर्ण केलेले असावेत.   (15)सर्टिफिकेट कोर्स इन मेकॅट्रॉनिक्स (16) सर्टिफिकेट कोर्स इन व्हीएलएसआय ॲण्ड एम्बेडेड सिस्टिम डिझाईन.  अनुक्रमांक 15 ते 16 या अभ्यासक्रमांसाठी उमेदवार हे इलेक्ट्रिकल/ ईसीई/इन्स्ट्रुमेंटेंशन/मेकॅनिकल/प्रॉडक्शन किंवा समकक्ष विषयातील पदवी/पदविकाधारक आयटीआयमधून पूर्ण केलेले  असावेत.

अनुक्रमांक 4,5,6,7,8,9,13,14,15 आणि 16 हे अभ्यासक्रम फक्त औरंगाबाद येथील केंद्रात उपलब्ध आहे.  अनुक्रमांक 1 ते 9 या अभ्यासक्रमांसाठी 40 हजार रुपये इतके, अनुक्रमांक 10 या अभ्यासक्रमासाठी 50 हजार रुपये इतके, तर अनुक्रमांक 11 ते 16 या अभ्यासक्रमांसाठी 25 हजार रुपये इतके शुल्क भरावयाचे आहे. 

अनुक्रमांक 10 या अभ्यासक्रमाचा कालावधी 12 महिन्यांचा असून या अभ्यासक्रमांचे शुल्क दोन हप्त्यात भरता येईल.  इतर अभ्यासक्रम हे 6महिने कालावधीचे आहेत.  हे अभ्यासक्रम यशस्वीरित्या पूर्ण केल्यानंतर उमेदवारांना नोकरी मिळण्यासाठी संस्थेतर्फे सहाय्य केले जाईल.  वसतिगृहाची सुविधा फक्त औरंगाबाद येथेच उपलब्ध आहे.  नियमानुसार विविध संवर्गांसाठी आरक्षण फी सवलत उपलब्ध आहे. 

            अधिक माहितीसाठी उमेदवारांनी कृपया संबंधित संस्थांमध्ये संपर्क साधावा तसेच संस्थेच्या    www.igtr-aur.org, www.igtr-aur.gov.in या संकेतस्थळास भेट द्यावी. 

संस्थांचे पत्ते :

1) इन्डो जर्मन टूल रुम, औरंगाबाद, पी-31, एम.आय.डी.सी. इंडस्ट्रियल एरिया,चिखलठाणा, औरंगाबाद - 431006 महाराष्ट्र,दूरध्वनी क्र.- (0240)-2486832, 2482593, 2470541,फॅक्स-(0240)-  2484028,   ईमेल – training@igtr-aur.org

2) इन्डो जर्मन टूल रुम, औरंगाबाद,एक्सटेन्शन सेंटर पुणे, आयजीटीआर-एमएसएमई डीआय कॅड/कॅम ट्रेनिंग सेंटर, शंकरशेठ रोड, पीएमटी वर्कशॉपजवळ, स्वारगेट,पुणे- 411037,महाराष्ट्र, दूरध्वनी क्र.-(020) 24440861, फॅक्स- (020) 24440862, ईमेल-igtr_pune@yahoo.co.in

3) इन्डो जर्मन टूल रुम, औरंगाबाद,एक्सटेन्शन सेंटर नागपूर, प्लॉट नं. पी-142, एमआयडीसी इंडस्ट्रियल एरिया, हिंगाणा, नागपूर-440006,महाराष्ट्र, दूरध्वनी क्र. (07104) 645114, फॅक्स (07104) 645114,ईमेल – training_ngp@igtr-aur.org

4) एमएसएमई डीआय-इन्डो जर्मन टूल रुम, औरंगाबाद, ट्रेनिंग सेंटर मुंबई,एमएसएमई डीआय, साकीनाका, कुर्ला-अंधेरी रोड, मुंबई - 400072,महाराष्ट्र, दूरध्वनी क्र.- (022) 28573020, 28573024, ईमेल-training_mum@igtr-aur.org

           - देवेंद्र भुजबळ

नगरपरिषद सार्वत्रिक निवडणूक संबंधी एक दिवसीय प्रशिक्षण संपन्न

नगरपरिषद सार्वत्रिक निवडणूक 2016

उस्मानाबाद:- नगरपरिषद सार्वत्रिक निवडणूक 2016  सुरळीत पार पाडण्यासाठी  आज जिल्हाधिकारी डॉ. प्रशांत नारनवरे यांनी येथील जिल्हाधिकारी कार्यालयात विविध विभागाच्या अधिकाऱ्यांची बैठक घेतली . या बैठकीस अप्पर पोलीस अधीक्षक दिपाली घाटगे  आणि इतर अधिकारी उपस्थित होते.

या बैठकीत जिल्हाधिकारी डॉ. नारनवरे यांनी सर्व संबंधित विभागाच्या अधिकाऱ्यांना  ही निवडणूक सुरळीत व अनुचित प्रकाराशिवाय पार पडावी याबाबत सूचना दिल्या. पोलीस प्रशासनाने मतदान केंद्राच्या 100 मीटर परिसरात  बॅरेकेटींग लावणे,  जिल्ह्यात चोख बंदोबस्त  ठेवणे, पेट्रोलिंग व झोनल प्लॅन तयार करणे, आचारसंहितेचा भंग होत असल्याचे आढळल्यास  तात्काळ कारवाई करणे ,  उत्पादन शुल्क विभागाने अवैध दारु  विक्रीवर विशेष लक्ष देणे,  तसेच नव्याने नियुक्त करण्यात आलेल्या  सर्व निवडणूक निर्णय अधिकारी ,  सहायक  निवडणुक  निर्णय अधिकारी , अतिरिक्त  निवडणूक  अधिकारी यांनी तक्रार निवारण केंद्र , सुविधा कक्ष स्थापित करणे , निवडणुकीविषयीच्या सर्व बातम्या डॅशबोर्डवर उपलोड करणे आदि सूचना यावेळी जिल्हाधिकारी डॉ. नारनवरे यांनी दिल्या. तसेच सर्व संबंधितांनी संबंधित सूचनांची कोटकोरपणे अंमलबजावणी  करण्याबाबत सूचित केले.

याशिवाय सर्व निवडणूक निर्णय अधिकारी ,  सहायक  निवडणूक  निर्णय अधिकारी , अतिरिक्त  निवडणूक  अधिकारी यांनी त्या-त्या प्रभागांना भेटी  देऊन  निवडणूक  कामकाजासंदर्भातील विविध  आवश्यक बाबींचे  सुक्ष्म निरीक्षण करुन त्यात आवश्यता भासल्यास  सुधारणा कराव्यात , नगरपालिका प्रभागात  मतदार  जागृती अभियान मोठ्या प्रमाणात  राबवावे, निवडणूक  प्रक्रियेसंदर्भात  आवश्यक ती पथके  स्थापित  करावित , अशा विविध  सुचनाही यावेळी जिल्हाधिकारी डॉ. नारनवरे यांनी उपस्थितांना दिल्या.

 नामनिर्देशनपत्र भरण्याची प्रक्रिया ही यावेळेस ऑनलाईन करण्यात आली आहे. मतदान व मतमोजणीच्या दिवशी वीजपुरवठा खंडित होऊ नये याची काळजी महावितरण विभागाच्या अधिकाऱ्यांनी घेण्याबाबत  जिल्हाधिकारी डॉ. नारनवरे यांनी सूचित केले.

 या बैठकीनंतर नवनियुक्त निवडणूक निर्णय अधिकारी ,  सहायक  निवडणूक  निर्णय अधिकारी , अतिरिक्त  निवडणूक  अधिकारी  यांच्यासाठी नगरपरिषद सार्वत्रिक निवडणुकीसंबंधित आचारसंहिता , निवडणूक कालावधीत उमेदवारांकडून  विविध मार्गांनी होणाऱ्या खर्चाची  माहिती, पेड न्यूज इत्यादी विषयांबाबतचे  एक दिवसीय प्रशिक्षण  कार्यक्रमाचे आयोजनही करण्यात आले होते . या प्रशिक्षणामध्ये  अप्पर जिल्हाधिकारी  श्री. पाठक यांनी  उपस्थित  अधिकाऱ्यांना  आचारसंहिता  तसेच कोषागार अधिकारी श्री.पवार  यांनी  निवडणूक खर्चासंबंधी, उपजिल्हाधिकारी (निवडणूक) श्री. मुळे  यांनी पेड न्यूज संदर्भातील  मार्गदर्शक तत्वे  याविषयांबाबत मार्गदर्शन केले.

या बैठकीस  अप्पर जिल्हाधिकारी अविनाश पाठक, निवासी उपजिल्हाधिकारी श्री. सुनिल यादव, उपजिल्हाधिकारी (निवडणूक) श्री. प्रभोदय मुळे, कोषागार अधिकारी विशाल पवार आणि सर्व निवडणूक निर्णय अधिकारी ,सहायक  निवडणूक  निर्णय अधिकारी , अतिरिक्त  निवडणूक  अधिकारी आदि उपस्थित होते.