जिल्हयात जागतिक महिला दिनानिमित्त विविध कार्यक्रमांद्वारे होणार स्त्री शक्तीचा जागर

उस्मानाबाद,दि.7:जागतिक महिला दिनानिमित्त विभागीय स्‍तरावर  तसेच  जिल्‍हा, तालुका व गाव  पातळीवर  मोठया  प्रमाणात  साजरा  होण्‍याच्‍या  दृष्‍टीकोनातून  विभागीय आयुक्‍त श्री. पुरुषोत्‍तम भापकर व जिल्‍हाधिकारी श्री. प्रशांत नारनवरे यांनी वेळोवेळी आढावा बैठक घेवून जागतिक महिला  दिन  हा  विविध  उपक्रमांनी  व  प्रभावीपणे  साजरा  करण्याबाबत सूचना केल्या आहेत.  

जागतिक  महिला  दिनाची प्रभावी  अंमलबजावणी  करण्‍याच्‍या दृष्‍टीकोनातून उस्‍मानाबाद तालुका अंतर्गत सर्व तलाठी, ग्रामसेवक, कृषी सहायक, ग्रामरोजगार सेवक  यांची कार्यशाळा तहसिल कार्यालय उस्‍मानाबाद येथे दिनांक  7 मार्च रोजी आयोजित करण्‍यात आली होती.    

या कार्यशाळेस  तहसिलदार  उस्‍मानाबाद, नायब तहसिलदार, गट विकास अधिकारी उस्‍मानाबाद, तालुका कृषी अधिकारी  उस्‍मानाबाद, वन अधिकारी उस्‍मानाबाद, लागवड अधिकारी उस्‍मानाबाद, उप अभियंता सिंचन/बांधकाम  हे उपस्थित होते.

या कार्यशाळेमध्‍ये  गावपातळीवर  शाळा,  महाविद्यालय, ग्रामपंचायतमध्‍ये  विविध  उपक्रम घेवून जागतिक महिला दिन साजरा करण्‍याच्‍या सूचना देण्‍यात आल्‍या तसेच दिनांक 8 मार्च  रोजी विशेष महिला ग्रामसभा घेणे, बेटी  बचाव  बेटी  पढाओ  व  महिला सुरक्षा  कार्यक्रम राबविणे, मनरेगा- 100% नवीन जॉबकार्ड वाटप करणे, मनरेगा- जॉबकार्ड नूतनीकरण करणे,समृध्‍द महाराष्‍ट्र जनकल्‍याण योजनेंतर्गत  11  कामांची  माहिती  ग्रामस्‍थांना  देणे, वैयक्तिक  लाभाच्‍या  कामासाठी  लाभार्थी  निवड  करणे  व  ग्रामसभा  ठराव  घेणे,सिंचन विहीर,  वैयक्तिक शौचालय, शेततळे, फळबाग लागवड, शेळी/गुरे/कुक्‍कुटपालन शेड, शोषखडडे,  व्‍हर्मी/नाडेप कंपोस्‍टींग, वृक्ष लागवड आणि सार्वजनिक स्‍वरुपाच्‍या ग्राम सबलीकरण अंतर्गत कामाची    निवड करणे,संजय  गांधी  निराधार  योजनेंतर्गत लाभार्थ्यांचे  100 टक्के आधार  सिडींग  व  बॅक खात्याशी  संलग्‍न करणे,  लाभार्थ्‍याचे  थेट  लाभ  खात्‍यामध्‍ये  जमा  करणे (Direct Benefit Transfer) साठी  राष्‍ट्रीयकृत  बँकेचे  खाते,आधार क्रमांक,मोबाईल क्रमांक गोळा करणे,अपात्र लाभार्थी शोधणे, पात्र  लाभार्थी  शोधून त्‍यांना योजनेची  माहिती  देवून  अर्ज  भरण्‍यास  प्रवृत्‍त  करणे, सामाजिक  व  न्‍याय  विभागाच्‍या विविध  योजनांची  माहिती  ग्रामस्‍थांना  देणे, सार्वजनिक वितरण व्‍यवस्‍थेंतर्गत दोन दिवसीय कॅम्‍प आयोजित करुन नवीन युनिट रजिस्‍टर तयार करणे,सार्वजनिक वितरण व्‍यवस्‍थेंतर्गत आधार सिडींग 100% पूर्ण करणे,महिलांचा विशेष सहभाग असणा-या योजनांची प्रभावी अंमलबजावणी करणे या बाबी  प्रभावी व  परिणामकारकरित्‍या  राबविण्याबाबत सूचित करण्‍यात आले.

तसेच या विषयांची ग्रामसभेत चर्चा करुन या  योजनांमध्‍ये महिलांचा विशेष सहभाग नोंदविणेबाबत कार्यशाळेत सूचना देण्‍यात आलेल्‍या असून जागतिक महिला दिनाचे औचित्‍य साधून तहसिल कार्यालय उस्‍मानाबाद येथे दिनांक 08मार्च रोजी महिला आरोग्‍य तपासणी शिबिराचेही आयोजन करण्‍यात आले आहे तसेच महिला सुरक्षा कक्षाची स्‍थापनाही करण्‍यात आली आहे, अशी माहिती प्रशिक्षणार्थी जिल्हाधिकारी तथा उस्मानाबाद तहसिलदार आयुष प्रसाद यांनी दिली आहे.

चला स्त्रीशक्तीचा सन्मान वाढवूया- डॉ.प्रशांत नारनवरे

उस्मानाबाद.दि.7:-आपल्या प्रत्येकाच्या आयुष्यात जीवनाच्या टप्प्यावर स्त्री या घटकाची अत्यंत महत्वाची आहे. याबाबतची कृतज्ञता म्हणून 8 मार्च जागतिक महिलादिनाच्या निमित्ताने महिलाप्रती जिव्हाळा व आदर व्यक्त करून त्यांचा सन्मान  करून समाज प्रबोधन घडविण्याच्या दृष्टीने आपण सर्वांनी स्त्री शक्तींचा सन्मान वाढवूया असे आवाहन जिल्हाधिकारी डॉ. प्रशांत नारनवरे यांनी आज येथे केले.

8 मार्च हा जागतिक महिला दिन म्हणून सर्वत्र साजरा केला जातो,या पार्श्वभूमीवर उस्मानाबाद जिल्हयातही  हा  दिवस  सर्वांनी मिळून उत्साहाने,विविध उपक्रमांनी साजरा करावा याकरिता जिल्हाधिकारी काया्रलयात आयोजित बैठकीत ते बोलत होते.

यावेळी निवासी उपजिल्हाधिकारी सुनिल यादव, सरकारी अभियोक्ता श्री.शरद जाधवर, सार्वजनिक बांधकाम विभागाचे कार्यकारी अभियंता श्री. बी.एम. थोरात, महिला व बालविकास अधिकारी वैभव सूर्यवंशी, जिल्हा माहिती अधिकारी मनोज सानप, पोलीस उपअधीक्षक श्रीमती जहागिरदार हे उपस्थित होते.

डॉ.नारनवरे यांनी बैठकीत प्रत्येक शासकीय कार्यालयात महिला कक्षाची स्थापना करावी,महिलांच्या गरजांविषयी, समस्याविषयी जागरूकता आणि संवेदनशीलता वाढीस लागण्यासाठी जनजागृती करावी, प्रत्येक शासकीय कार्यालयात महिला तक्रार निवारण समिती स्थापन करावी अशा सूचना दिल्या.

डॉ.नारनवरे पुढे म्हणाले, सार्वजनिक बांधकाम विभागाने ज्या ज्या ठिकाणी महिला स्वच्छतागृहाची  कमतरता असेल त्या ठिकाणी त्यांची पाहणी करुन तात्काळ स्वच्छतागृहाची उभारणी करावी, महिलांना महिला विषयक कायदयांची माहिती मिळावी याकरिता मोठया प्रमाणावर कार्यशाळा आयोजित करण्यात याव्यात, सर्व महिलांकरिता आरोग्य तपासणी शिबिरे आयोजित करण्यात यावेत, त्याचबरोबर प्रत्येक शाळा, महाविद्यालये या ठिकाणी "निर्भया पेटी" बसविण्यात याव्यात आणि त्या बसविल्या आहेत की नाही याची शिक्षणाधिका-यांनी  खात्री करुन तसा अहवाल सादर करावा.

याशिवाय समाजात, शासनाच्या सेवेत उत्कृष्ट सेवा बजावणाऱ्या महिलांचा यथोचित सत्कार व्हावा, महिलांविषयी संवेदनशील राहून त्यांना सामाजिकदृष्या भावनिक आधार दयावा,उत्कृष्ट काम करण्याचा महिलांना अधिक चांगल्या कामासाठी सहकार्य करावे,असे आवाहनही डॉ. नारनवरे यांनी यावेळी  केले.

या बैठकीस जिल्हा महिला व बालविकास अधिकारी श्री.वैभव सूर्यवंशी, सहाय्यक समाज कल्याण अधिकारी  अमित घवले, जिल्हा परिविक्षा अधिकारी एस.बी शेळके,परिविक्षा अधिकारी श्री.व्ही.जी.शिंदे,परिविक्षा अधिकारी एम.ए.पाटील, संरक्षण  अधिकारी  श्रीमती  शीतल  कोठावळे, डॉ.राहूल वाघमारे आदि  उपस्थित होते.

“मनरेगा सप्ताह” सर्वसमावेशक व्हावा -डॉ. पुरषोत्तम भापकर

उस्मानाबाद.दि.6:-  महात्मा  गांधी  राष्ट्रीय ग्रामीण  रोजगार  हमी योजना  अर्थात  मनरेगा  योजना ही खऱ्या अर्थाने  सर्वसमावेशक  होवून  त्याचा  तळागाळातील  जनतेला  लाभ व्हावा  यासाठी  शासन, लोकप्रतिनिधी , शासकीय अधिकारी कर्मचारी आणि जनता या सर्वांनी  मिळून  हा मनरेगा सप्ताह  यशस्वी  करु या , असे आवाहन  विभागीय  आयुक्त  डॉ. पुरुषोत्तम  भापकर  यांनी आज  औरंगाबाद येथे केले .

डॉ.भापकर यांनी मनरेगा सप्ताहाच्या यशस्वीतेसाठी आज औरंगाबाद विभागातील सर्व  जिल्हाधिकारी, मुख्य  कार्यकारी  अधिकारी,  रोजगार हमी  योजनेचे  संबंधित  अधिकारी , वन  अधिकारी, कृषी  अधिकारी  यांच्याशी व्हिडिओ  कॉन्फरसिंगद्वारे  संवाद साधला , त्यावेळी ते बोलत होते.

यावेळी  उस्मानाबादचे जिल्हाधिकारी  डॉ. प्रशांत  नारनवरे, मुख्य  कार्यकारी अधिकारी  आनंद रायते,अप्पर जिल्हाधिकारी अविनाश पाठक,उपजिल्हाधिकारी प्रभोदय मुळे,सचिन बारावकर,चेतन गिरासे,  जिल्हा कृषी अधीक्षक  शिरीष  जमदाडे , उप मुख्य  कार्यकारी अधिकारी  रावसाहेब चव्हाण, डॉ. शैलेश जाधव , जिल्हा माहिती अधिकारी  मनोज  शिवाजी  सानप हे उपस्थित होते .

 डॉ. भापकर यांनी यावेळी  ग्रामसभेसाठी  संपर्क अधिकारी  वर्ग 2 व 3 वरिष्ठ श्रेणी यांची  ग्राम संपर्क अधिकारी  म्हणून  नेमणूक  करण्यात यावी,ग्रामसभेत  संबंधित  ग्राम पंचायतचे  ग्रामसेवक , तलाठी, कृषी सहायक,लागवड अधिकारी, ग्राम रोजगार  सेवक, कार्यान्वयीन यंत्रणांचे सर्व संबंधित  कर्मचारी व संपर्क अधिकारी  यांनी उपस्थित  राहणे बंधनकारक  असून त्यांनी वरिष्ठ  कार्यालयाने  दिलेल्या सूचनांप्रमाणे आवश्यक कार्यवाही करावी,  विशेष  ग्रामसभेसाठी  नियुक्त  केलेल्या  तालुक्यातील  सर्व ग्राम पंचायतच्या संपर्क अधिकारी  यांचे दिनांक 7 मार्च 2017 रोजी  संबंधित तालुक्याचे  उपविभागीय अधिकारी  यांनी उध्दोधक  प्रशिक्षण  घेवून  योजनेबाबत  व ग्रामसभेमध्ये  करावयाच्या  कार्यवाहीबाबत  योजना व विषयनिहाय आवश्यक  मार्गदर्शन  उपस्थित उपविभागीय  अधिकारी, तहसिलदार , गट विकास  अधिकारी, वन अधिकारी, लागवड अधिकारी, उप अभियंता  सिंचन, बांधकाम  व तालुका कृषी अधिकारी  यांनी करावे , प्रत्येक ग्रामसभेसाठी  नियुक्त  केलेल्या संपर्क अधिकारी  यांना समृध्द महाराष्ट्र जनकल्याण योजनांची हस्तपुस्तिका व मनरेगाची आवश्यक माहितीही देवून आवश्यकतेप्रमाणे जॉबकार्ड  उपजिल्हाधिकारी (रोहयो), उपमुख्य कार्यकारी  अधिकारी पंचायत नरेगा, गट विकास अधिकारी  यांनी  उपलब्ध करुन  द्यावेत, ग्रामपंचायत  अंतर्गत पात्र असलेल्या 100 टक्के  लाभार्थ्यांना  ग्रामसभेमध्ये  जॉबकार्ड वाटप  तसेच नुतनीकरण  करण्यात यावे, कमी वेळेत  मोठ्या  संख्येने  कुटुंबांना  जॉबकार्ड  वाटप करावे लागणार  असल्याने  जॉबकार्ड  लिहिणे, कुटुंबाचा फोटो उपलब्ध करणे , नवीन  फोटो  काढणे , फोटो डकवणे इत्यादीसाठी  ग्रामसेवकाने  ग्राम रोजगार  सेवक, सरपंच, गावातील  तरुण, बचत गट  व इतर  सुशिक्षित  बेरोजगार , स्वयंसेवी / सामाजिक संस्था इत्यादी  यांचा सहभाग घ्यावा .

महात्मा गांधी  राष्ट्रीय  ग्रामीण रोजगार  हमी योजनेची माहिती देणे समृद महाराष्ट्र  जनकल्याण योजनेंतर्गत 11 कामांची  माहिती उपस्थित  ग्रामस्थांना देणे, ग्रामपंचायत अंतर्गत जॉबकार्ड ,  मिळण्यापासून  वंचित राहिलेल्या सर्व कुटुंबांना ग्रामसभेत जॉबकार्ड अदा करणे , ग्रामपंचायत  अंतर्गत  उपलब्ध असलेल्या जॉबकार्डचे  नुतनीकरण करणे, समृध्द  महाराष्ट्र  जनकल्याण योजनेंतर्गत  ग्राम पंचायत अंतर्गत  सन 2016-17  व सन 2017-18 मध्ये घ्यावयाच्या कामांची निवड करणे , समृध्द  महाराष्ट्र जनकल्याण  योजनेंतर्गत  सन 2016-17 व सन 2017-18  साठी वैयक्तिक  लाभाच्या कामासाठी  लाभार्थी  निवड करणे, यामध्ये  सिंचन विहिर, वैयक्तिक  शौचालय, शेततळे, फळबाग लागवड आणि सार्वजनिक  स्वरुपाच्या  ग्राम  सबलीकरणांतर्गत  कामांची  निवड करणे , ग्रामसभेने निवडलेल्या लाभार्थी , कामे व  सन 2016-17  व सन 2017-18 सुधारित  वार्षिक कृती आराखड्यास  ग्रामसभेची  मान्यता घेणे , ग्रामसभेत केलेल्या  कार्यवाहीच्या  प्रपत्राच्या दोन प्रतीपैकी एक प्रत  गट विकास  अधिकारी  यांनी  संकलीत  करुन तहसिलदार यांच्याकडे  सादर करावी , तहसिलदार यांनी प्राप्त  झालेल्या  आराखड्याच्या  आधारे छाननी  समितीची मान्यता घेण्याच्या दृष्टीने  आवश्यक ती  कार्यवाही  करावी , उप विभागीय  अधिकारी  यांच्या अध्यक्षतेखालील  छाननी  समितीने  नियमानुसार  आवश्यक ती  कार्यवाही तात्काळ  करावी, ग्रामसभेने मंजूर  केलेल्या  सन 2016-17 व 2017-18  च्या सुधारित  कामांचा ग्राम पंचायत वार्षिक  आराखडा  दोन प्रतीत  तयार करुन  एक प्रत  गट विकास  अधिकारी  व तहसिलदार  यांनी जिल्हाधिकारी  यांच्याकडे  दिनांक 10 मार्च 2017  रोजी सादर करावा, तसेच ग्रामपंचायत  सुधारित  आराखड्यास  दिनांक 11 मार्च पर्यंत  पंचायत  समिती सर्वसाधारण  सभेची  मान्यता घेवून  जिल्हाधिकारी  यांच्याकडे  विहित  नमुन्यात  आराखडा  सादर करण्यात यावा , असेही डॉ. भापकर यांनी असे सूचित केले.

यानंतर जिल्हाधिकारी  यांनी पंचायत  समितीच्या सुधारित  वार्षिक  आराखड्यास  जिल्हा परिषद सर्वसाधारण  सभेची  नियमानुसार  तात्काळ मान्यता  घेवून  सदर  सुधारीत  वार्षिक  आराखडा आयुक्त, महात्मा गांधी राष्ट्रीय ग्रामीण  रोजगार  हमी योजना , महाराष्ट्र  नागपूर  यांच्याकडे  दिनांक 20 मार्च 2017 पर्यंत सादर करावा, वैयक्तिक लाभाची  कामे मोठ्या  प्रमाणावर घ्यावयाची  असल्याने  ई-हजेरी  पत्रके पर्याप्त संख्येमध्ये ग्रामसेवक व ग्राम  रोजगार सेवक यांना उपलब्ध  करुन  देण्याची जबाबदारी  तहसिलदार, गट विकास अधिकारी, तालुका  कृषी  अधिकारी, तालुका लागवड अधिकारी व वन अधिकारी  यांची राहील,अनेक कामे छोट्या स्वरुपाची व कमी  कालावधीची  असल्याने उदा. शोषखड्डा,  शौचालय , नाडेप / व्हर्मी  कंपोस्ट  हे प्रत्येक  गावात समूह  स्वरुपात  मोठ्या  स्वरुपात  होणार  असल्याने ई- हजेरी  पत्रके  त्या संख्येत 24 तासात  ग्रामसेवक, ग्राम रोजगार  सेवक यांना उपलब्ध  करुन दिले जातील हे संबंधित  तहसिलदार व गट विकास  अधिकारी  यांनी पहावे, ई- हजेरी  पत्रके वितरीत  करण्यास  कोणताही  कालापव्यय  होणार नाही याची सर्व संबंधितांनी  दक्षता घ्यावी,वेळेत शेकडोच्या  संख्येने  ई-हजेरी  पत्रके  उपलब्ध  करुन देणे आवश्यक असल्याने  यासाठी आवश्यक मनुष्यबळ संबंधित कार्यान्वीत  यंत्रणांना  जिल्हाधिकारी  व मुख्य कार्यकारी  अधिकारी , जिल्हा परिषद यांनी उपलब्ध करुन द्यावेत व याबाबत  आवश्यक  ते पूर्वनियोजन  करुन कार्यवाही  करावी ,  घेण्यात  येणारी  वैयक्तिक  लाभाची  कामे मोठ्या  संख्येने  व कमी  कालावधीची  असल्याने  सदर कामाचे  मोजमाप वेळेत  होऊन  अकुशल  व कुशल  देयके  निर्धारीत  कालावधीत  अदा करणे आवश्यक  असल्याने  कामांच्या प्रमाणात  प्रत्येक  तालुक्यास आवश्यक  ते तांत्रिक मनुष्यबळ उपलब्ध  करुन देण्याची  जबाबदारी  जिल्हाधिकारी  यांची  राहील,  याबाबत संबंधित  जिल्हाधिकारी  यांनी आवश्यक  ते पूर्वनियोजन  करुन कार्यवाही  करावी, अशा सूचना  दिल्या .