जिल्हा विधी सेवा प्राधिकरणातर्फे विविध शासकीय योजनांचा मेळावा

उस्मानाबाद, 22 :- जिल्हा विधी सेवा प्राधिकरण, उस्मानाबाद यांच्या वतीने उस्मानाबाद जिल्हयातील जिल्हा विधी सेवा प्राधिकरण, उस्मानाबाद यांच्यामार्फत दि. 30 जानेवारी रोजी सकाळी 10 ते 4 या वेळेत उस्मानाबाद येथील बसस्थानक परिसरात विविध शासकीय कार्यालयामार्फत राबविण्यात येणाऱ्या आणि जनतेच्या कल्याणकारी विविध शासकीय योजनांच्या माहितीचे स्टॉल्स लावण्यात येणार आहेत. यामध्ये सध्या कार्यरत असलेल्या शासनाच्या विविध योजनांचा समावेश राहणार आहे.

तरी जास्तीत-जास्त जनतेने या शिबिराचा लाभ घ्यावा, असे आवाहन जिल्हा प्रमुख न्यायाधीश आर.आर. देशमुख, जिल्हा विधी सेवा प्राधिकरणाचे सचिव श्री. एस.बी. देसाई तसेच विधीज्ञ संघाचे अध्यक्ष ॲङ निलेश बारखेडे यांच्या वतीने करण्यात आले आहे.

          या मेळाव्यात पशुसंवर्धन, कृषी विभाग, महिला व बालविकास, महिला आर्थिक विकास महामंडळ, शिक्षण विभाग जिल्हा परिषद, जिल्हा शल्य चिकित्सक, जिल्हा ग्रामीण विकास यंत्रणा, रोजगार हमी योजना, समाजकल्याण, सहाय्यक संचालक जिल्हा रोजगार व स्वयंरोजगार अधिकारी, डी.आय.सी., स्वच्छता मिशन, जिल्हा अग्रणी बँक, जिल्हा रेशीम विकास अधिकारी, जिल्हा विधी सेवा प्राधिकरण व जिल्हा पोलीस विभाग हे विभाग सहभागी होणार आहेत. 

आपले पोलिस आपली अस्मिता लोकराज्य पोलिस विशेषांकाचे प्रकाशन

उस्मानाबाद,18, शासनाच्या विविध योजना सर्वसामान्य जनतेपर्यंत पोंहचवून, अल्पावधीतच लाखो वाचकांच्या -हदयातस्थान निर्माण करणा-या, शासनाचे मुखपत्र लोकराज्य आपले पोलिस आपली अस्मिता या पोलिस विशेषांकाचे प्रकाशन उस्मानाबाद जिल्ह्याचे पोलिस अधीक्षक श्री. पंकज देशमुख यांच्या हस्ते बुधवारी, 18 जानेवारी रोजी करण्यात आले. यावेळी जिल्हा माहिती अधिकारी श्री. मनोज शिवाजी सानप, यांच्यासह अन्य पोलिस अधिकारी व कर्मचारी उपस्थित होते.

          यावेळी  श्री देशमुख यांनी पोलिस विशेषांकाचे कौतुकही केले. यावेळी पोलिस अधीक्षक म्हणाले की, पोलिस विभागामार्फत करण्यात आलेल्या कामगिरीवर आधारीत जानेवारी 2018 चा लोकराज्यचा अंक हा दर्जेदार आणि वाचनीय आहे. तसेच लोकराज्यमध्ये शासनाच्या विविध योजनांची माहिती प्रसिद्ध करण्यात येते. त्यामुळे स्पर्धा परिक्षांची तयारी करणा-या विद्यार्थ्यांनी या अंकाचे नियमित वाचन केल्यास, याचा विद्यार्थ्यांना नक्कीच फायदा होईल, असा विश्वासही यावेळी त्यांनी  व्यक्‍त केला. यावेळी त्यांनी पोलिस अधीक्षक कार्यालयातील अधिकारी व कर्मचा-यांची 100 प्रतींची नोंदणीही पोलिस विशेषांकाच्या प्रकाशनावेळी केली.

शासनाचे मुखपत्र असलेले लोकराज्य मासिकाचे वार्षीक सभासद होण्यासाठी तात्काळ जिल्हा माहिती कार्यालयाशी संपर्क साधावा, असे आवाहनही यावेळीस जिल्हा माहिती अधिकारी श्री. मनोज शिवाजी सानप यांनी केले.  

जलयुक्त शिवारच्या माध्यमातून जिल्हयात मोठया प्रमाणात पाणीसाठा होईल यादृष्टीने कामे करावीत - एकनाथ डवले

उस्मानाबाद,दि.13:- जलयुक्त शिवार अभियानांतर्गत जिल्हयातील एकूण 586 गावांची निवड करण्यात आली असून तीनही टप्प्यातील कामांमुळे पाणीसाठा मोठया प्रमाणात होईल यादृष्टीने प्रयत्न करावेत असे प्रतिपादन मृद, जलसंधारण व रोहयो सचिव एकनाथ डवले यांनी आज येथे केले.  

जिल्हाधिकारी कार्यालयात आयोजित आढावा बैठकीत ते बोलत होते. यावेळी अप्पर जिल्हाधिकारी पराग सोमण, अतिरिक्त मुख्य कार्यकारी अधिकारी अनुप शेंगुलवार, निवासी उपजिल्हाधिकारी राजेंद्र खंदारे, जिल्हा नियोजन अधिकारी श्री. आडे, जिल्हा अधीक्षक कृषी अधिकारी सुभाष चोले, कार्यकारी अभियंता लघु पाटबंधारे श्री. कांबळे यांच्यासह उपविभागीय अधिकारी उस्मानाबाद, उमरगा, कळंब, परंडा यांच्यासह अधिकारी व कर्मचारी यांची उपस्थिती होती.  

ते पुढे म्हणाले की, जलयुक्त शिवार अभियान, रोजगार हमी योजनेची जिल्हयातील सर्वच कामे चांगल्या दर्जाची होण्यासाठी अधिकाऱ्यांनी विशेष प्रयत्न करणे गरजेचे असून या सर्व कामांतून पाणीसाठा मोठया प्रमाणात वाढण्यासाठी सर्व यंत्रणांनी आराखडा तयार करावा व त्यानुसार कामकाजाचे योग्य नियोजन करुनच कामे करावीत.  

जिल्हा अधीक्षक कृषी अधिकारी सुभाष चोले यांनी जलयुक्त शिवार अभियानाची माहिती देताना सांगितले की, सन 2015-16 ची 21 हजार 25 कामे पूर्ण करण्यात आली आहेत त्यामुळे सन 2015-16 मध्ये 25 हजार 190.68 टी.सी.एम. पाणीसाठा झाला असून 89 हजार 452.36 हेक्टर संरक्षित सिंचन क्षमता निर्माण होण्यास मदत झाली आहे. सन 2016-17 मधील 16 हजार 795 कामांपैकी 9 हजार 759 कामे पूर्ण करण्यात आली आहेत. त्यामुळे 16 हजार 163.39 टी.सी.एम. पाणीसाठा झाला असून 9 हजार 330.24 हेक्टर संरक्षित सिंचन क्षमता निर्माण होण्यास मदत झाली आहे.

यावेळी श्री. एकनाथ डवले यांनी सर्व विभागप्रमुखांकडून जिल्हयातील विविध कामांचा आढावा घेतला.उपस्थित विभागप्रमुखांनी  आपापल्या विभागासंबंधी कामकाजाबाबतचे सादरीकरण यावेळी केले.

या बैठकीस जिल्हयातील सर्व अधिकारी व कर्मचारी यांची उपस्थिती होती.