नियुक्ती संस्था व उमेदवारांनी रोजगार महाकुंभात मोठ्या संख्येने सहभागी व्हावे
जिल्हाधिकारी कीर्ती किरण पुजार यांचे आवाहन
बैठकीतून घेतला तयारीचा आढावा
२९ सप्टेंबरला जिल्ह्यात दहा ठिकाणी रोजगार मेळावे
धाराशिव,दि.१० सप्टेंबर (जिमाका) जिल्ह्यात येत्या २९ सप्टेंबर रोजी जिल्ह्यात दहा ठिकाणी ‘रोजगार महाकुंभ- महाराष्ट्र’चे आयोजन करण्यात आले आहे.जिल्ह्यातील विविध आस्थापना,कारखाने व उद्योगांनी युवकांना रोजगाराच्या संधी उपलब्ध करून देण्यासाठी,तसेच नोकरीच्या शोधात असलेल्या युवक-युवतींनी रोजगार मिळविण्यासाठी या रोजगार महाकुंभात मोठ्या संख्येने सहभागी व्हावे,असे आवाहन जिल्हाधिकारी कीर्ती किरण पुजार यांनी केले.
जिल्हाधिकारी कार्यालयात आज, दि.१० सप्टेंबर रोजी ‘रोजगार महाकुंभ-महाराष्ट्र’च्या पूर्वतयारीच्या अनुषंगाने आयोजित आढावा बैठकीत जिल्हाधिकारी श्री.पुजार बोलत होते.यावेळी जिल्हा उद्योग केंद्राचे सहाय्यक आयुक्त अमोल बळे,जिल्हा माहिती अधिकारी विवेक खडसे, जिल्हा रोजगार व स्वयंरोजगार मार्गदर्शन केंद्राचे सहाय्यक आयुक्त संजय गुरव,जिल्हा व्यवसाय शिक्षण व प्रशिक्षण अधिकारी कार्यालयाचे एस.के.गायकवाड, महावितरणचे स्वप्निल वाणी,वस्तू व सेवा कर कार्यालयाचे सहाय्यक राज्यकर आयुक्त पी.बी.चव्हाण, जिल्हा उपनिबंधक कार्यालयाचे जी.एस. कुलकर्णी तसेच सरकारी कामगार अधिकारी कार्यालयाचे दुकाने निरीक्षक सचिन अर्बट यांची प्रमुख उपस्थिती होती.
जिल्हाधिकारी श्री.पुजार म्हणाले की, विविध आस्थापनांमध्ये रिक्त असलेल्या पदांची माहिती तातडीने उपलब्ध करून द्यावी.जिल्ह्यातील कुशल मनुष्यबळ आणि युवक- युवतींना रोजगाराच्या अधिकाधिक संधी उपलब्ध करून देणे हा या रोजगार महाकुंभाचा प्रमुख उद्देश आहे.या माध्यमातून विविध आस्थापनांना कमी वेळेत त्यांच्या गरजेनुसार कुशल मनुष्यबळ उपलब्ध होणार आहे.त्यामुळे उद्योग आणि आस्थापनांनी त्यांच्याकडील रिक्त पदांची माहिती नोंदवून या उपक्रमात सक्रिय सहभाग घ्यावा.खासगी रुग्णालयांनीही रिक्त पदांची नोंदणी करावी.आरोग्य क्षेत्रातही रोजगाराच्या मोठ्या संधी उपलब्ध आहेत.रोजगार महाकुंभाच्या माध्यमातून खासगी रुग्णालयांनाही आवश्यक मनुष्यबळ मिळू शकणार आहे.त्यामुळे जिल्ह्यातील खासगी रुग्णालयांनी त्यांच्याकडील रिक्त जागांची तातडीने नोंदणी करावी.शासन आणि संबंधित आस्थापनांच्या माध्यमातून रोजगार उपलब्ध होणाऱ्या युवकांना मानधन देण्यात येणार असल्याचेही श्री.पुजार यांनी सांगितले.
यावेळी श्री.गुरव यांनी २९ सप्टेंबर रोजी जिल्ह्यात होणाऱ्या ‘रोजगार महाकुंभ- महाराष्ट्र’च्या आयोजनाबाबत सविस्तर माहिती दिली.उद्योग,नियुक्ती संस्था, कौशल्य प्रशिक्षण संस्था आणि नोकरी इच्छुक उमेदवार या रोजगार महाकुंभाच्या माध्यमातून एकाच व्यासपीठावर येणार आहेत.त्यामुळे उद्योगांना त्यांच्या गरजेनुसार पात्र आणि कौशल्याधारित मनुष्यबळ उपलब्ध होईल, तर युवक- युवतींना विविध रोजगार संधींसाठी थेट नियुक्ती संस्थांशी संवाद साधता येणार आहे.या मेळाव्यात उमेदवारांची थेट जागेवर निवड करण्याची संधीही उपलब्ध होणार आहे.
जिल्ह्यातील विविध ५० नियुक्ती संस्थांनी आतापर्यंत कुशल मनुष्यबळाला रोजगार उपलब्ध करून देण्यासाठी गुगल फॉर्म भरून प्रतिसाद नोंदविला आहे.तसेच १,२७८ उमेदवारांनी आतापर्यंत रोजगारासाठी ऑनलाइन नोंदणी केली असल्याची माहिती सहाय्यक आयुक्त संजय गुरव यांनी बैठकीत दिली.
या बैठकीला जिल्ह्यातील विविध उद्योग, आस्थापना,संस्था, पतसंस्था तसेच खासगी रुग्णालयांचे प्रतिनिधी उपस्थित होते. उपस्थितांचे आभार श्री. गुरव यांनी मानले.
******
