जिल्ह्यात Re-NEET (UG) २०२६ परीक्षेची रंगीत तालीम;
जिल्हाधिकाऱ्यांकडून प्रत्यक्ष परीक्षा केंद्रांचा सखोल आढावा
धाराशिव,दि.२० जून (जिमाका) जिल्हा केंद्रावर रविवार,दिनांक २१ जून २०२६ रोजी राष्ट्रीय परीक्षा एजन्सी,नवी दिल्ली यांच्या वतीने वैद्यकीय शिक्षण प्रवेश परीक्षा-२०२६ (Re-NEET (UG)-२०२६) आयोजित करण्यात येणार असून ही परीक्षा दुपारी २ ते ५.१५ या कालावधीत (दिव्यांग परीक्षार्थींसाठी दुपारी २ ते सायंकाळी ६.२०) पार पडणार आहे. जिल्ह्यातील एकूण ५ उपकेंद्रांवर ही परीक्षा घेण्यात येणार असून एकूण २०७२ परीक्षार्थी परीक्षेस बसणार आहेत.
विद्यार्थ्यांच्या भविष्याच्या दृष्टीने अत्यंत संवेदनशील व महत्त्वाची असलेल्या या परीक्षेबाबत जिल्हाधिकारी कीर्ती किरण पुजार यांनी आज २० जून रोजी पोलीस प्रशासनासमवेत प्रत्यक्ष परीक्षा केंद्रांना भेट देऊन सविस्तर आढावा घेतला.यावेळी CCTV व्यवस्था,जॅमर एजन्सी, बायोमेट्रिक व्यवस्था,फ्रिस्किंग, व्हिडिओग्राफर यांसह विद्यार्थ्यांसाठी पिण्याच्या पाण्याची व्यवस्था व इतर आवश्यक सुविधा यांचा सखोल आढावा घेण्यात आला.तसेच परीक्षा संपल्यानंतर उत्तरपत्रिका सुरक्षितपणे पोस्टाद्वारे पाठविण्याच्या प्रक्रियेबाबत प्रत्यक्ष पोस्ट कार्यालयात जाऊन उत्तरपत्रिका जमा करण्याच्या व्यवस्थेचाही आढावा घेण्यात आला.
परीक्षेच्या पूर्वतयारीच्या अनुषंगाने घेण्यात आलेल्या या मॉक ड्रिलमध्ये किर्ती किरण पुजार,जिल्हाधिकारी,धाराशिव; सचिन पांडकर,अपर पोलीस अधीक्षक, धाराशिव,श्री.विद्याचरण कडवकर,निवासी उपजिल्हाधिकारी तथा नोडल अधिकारी, जिल्हा प्रशासन (Re-NEET (UG)-2026); डॉ.मो.रा.लोहोकरे, प्राचार्य,शासकीय तंत्रनिकेतन,धाराशिव तथा नोडल अधिकारी (NTA); श्री.ए.आर.भुजबळ,पोलीस निरीक्षक, पोलीस अधीक्षक कार्यालय,धाराशिव; श्री.संतोष पाटील,नायब तहसीलदार (आस्था),जिल्हाधिकारी कार्यालय, धाराशिव तसेच इतर विभागांचे अधिकारी व कर्मचारी उपस्थित होते.
तसेच या परीक्षेसंदर्भात कोणतीही माहिती किंवा समस्या असल्यास नोडल अधिकारी (NTA) डॉ.मो.रा.लोहोकरे,प्राचार्य, शासकीय तंत्रनिकेतन,धाराशिव (मो.८२७५४६००३५) यांच्याशी संपर्क साधून आवश्यक ती मदत घेता येईल,असे आवाहन जिल्हाधिकारी कीर्ती किरण पुजार यांनी केले आहे.
*******
