उस्मानाबाद,
दि. 20:-नगरपरिषदेच्या सार्वत्रिक निवडणुकीचा कार्यक्रम घोषित करण्यात आला आहे.
निवडणूक सुरळीत आणि कोणत्याही अनुचित प्रकाराशिवाय पार पाडण्यासाठी शासकीय यंत्रणा
सज्ज करण्यात आल्याची माहिती जिल्हाधिकारी
डॉ. प्रशांत नारनवरे यांनी आज पत्रकार परिषदेत दिली.तसेच या निवडणुकीसाठी निवडणूक
निर्णय अधिकारी , सहायक निवडणुक
निर्णय अधिकारी , अतिरिक्त निवडणूक अधिकारी नियुक्त करण्यात
आल्याचे माहितीही त्यांनी यावेळी दिली.
डॉ. नारनवरे
म्हणाले, 17 ऑक्टोबरपासून निवडणूक आचारसंहिता लागू करण्यात आली आहे. उमेदवारांची यादी
अंतिम झाल्यानंतर त्यांच्याकडून खर्च मागविण्यात येणार आहे. यात उमेदवाराने स्वत: केलेला
खर्च, पक्षाने केलेला खर्च आणि मित्र, नातेवाईकांनी केलेला खर्च, याशिवाय निवडणूक
प्रचाराकरिता सोशल मिडियाच्या वापराकरिता झालेला इंटरनेटचा खर्चही ग्राह्य धरण्यात येणार आहे.
उमेदवारांना
विविध कार्यालयात परवानगीसाठी जावे लागू नये यासाठी तहसील कार्यालयात एक खिडकी तयार
करण्यात येणार असून त्या ठिकाणाहूनच सर्व परवानगी देण्यात येणार आहे. पक्षाच्या उमेदवाराला
एक सूचक आणि अपक्ष उमेदवाराला पाच सूचक द्यावे लागणार आहे. नगरपरिषदेसाठी 166 सदस्य आरक्षणासह
निवडण्यात येणार आहे. यासाठी 2 लाख 11 हजार 314 मतदार राहणार असून 80 प्रभागात ही निवडणूक
घेण्यात येणार असून 278 मतदान केंद्र राहणार आहे. दि.27 नोव्हेंबर रोजी मतदान होणार असून 28 नोव्हेंबर
रोजी मतमोजणी करण्यात येणार असल्याचे डॉ. नारनवरे
यांनी या पत्रकार परिषदेत सांगितले.
यावेळी निवासी
उपजिल्हाधिकारी श्री. सुनिल यादव
, उपजिल्हाधिकारी (सा.प्र.) श्री. सचिन बारवकर , उपजिल्हाधिकारी निवडणूक श्री.
प्रभोदय मुळे , मुख्याधिकारी श्री. राजीव बुबणे तसेच जिल्ह्यातील सर्व पत्रकार आदि उपस्थित होते.
